44278” مسند عمر بن بکالی “ ابن عساکر کہتے ہیں : راوی کا نسب نہیں بیان کیا گیا، بعض کہتے ہیں : ابن سیف عن عمر بن بکالی، فرمایا : اے لوگو نیک اعمال کرو اور بشارت قبول رکرو تین اعمال ایسے ہیں انھیں جو بھی کرتا ہے اس کے لیے جنت واجب ہوجاتی ہے۔ لوگوں نے پوچھا : وہ کونسے اعمال ہیں فرمایا : ایک وہ آدمی جو فتنہ میں مبتلا ہو اور پھر فتنے کے آگے سینہ سپر ہوگیا حتیٰ کہ اس کا خون بہہ گیا اللہ تعالیٰ اپنے فرشتوں سے فرمائے گا : ایسا کرنے پر میرے بندے کو کس چیز نے برانگیختہ کیا ہے ؟ فرشتے جواب دیں گے : اے ہمارے رب ! تو نے اسے ایک چیز کی امید دلائی تھی وہ اس امید پر قائم رہا اور تو نے اسے ایک چیز سے خوفزدہ کیا جس سے وہ خوفزدہ رہا۔ حکم ہوگا میں تمہیں گواہ بناتا ہوں کہ میں نے اس کی امید (جنت) کو واجب کردیا اور جس چیز (دوزخ) سے ڈرتا تھا اس سے اسے بےخوف کردیا۔ ایک وہ آدمی جو گر مگر م آگ اور بستر کو ٹھنڈی رات میں چھوڑ کر وضو کر لیے اٹھ کھڑا ہوتا ہے اور نماز پڑھتا ہے۔ اللہ تعالیٰ اپنے فرشتوں سے دریافت کرتے ہیں : اے میرے فرشتو ! اس آدمی کو اس پر کس چیز نے اکسایا ہے ؟ فرشتے جواب دیں گے : اے ہمارے رب تو نے اسے ایک چیز (جنت) کی امید دلائی تھی وہ اس امید پر قائم رہا اور ایک چیز۔ (دوزخ) سے خوفزدہ کیا تھا وہ اس سے خوفزدہ رہا ۔ حکم ہوگا : تم گواہ رہو میں نے اس امید کی چیز (جنت) عطا کیا اور خوف کی چیز (دوزخ) سے اسے مامون کردیا۔ تیسرے وہ لوگ جو ایک جگہ جمع ہوں اور انھیں کوئی آدمی قرآن پڑھ پڑھ کر سناتا ہو اور وہ سن کر روتے ہوں۔ اللہ تعالیٰ اپنے فرشتوں سے پوچھتا ہے ان لوگوں کو اس عمل پر کس چیز نے اکسایا ہے ؟ فرشتے جواب دیں گے : اے ہمارے رب تو نے انھیں ایک چیز کی امید دلائی تھی وہ اس امید پر قائم رہے اور انھیں ایک چیز سے خوفزدہ کیا تھا وہ اس سے خوفزدہ رہے حکم ہوگا : تم گواہ رہنا میں نے ان کی امید (جنت) کو واجب کردیا اور خوف دلانے والی چیز (دوزخ) سے مامون کردیا۔ رواہ مندہ والبغوی وابن عساکر