4471: ۔۔۔ کثیر النواء سے مروی ہے کہ کہتے ہیں کہ میں نے حضرت ابوجعفر (صادق (رح)) کو کہا : مجھے فلاں شخص نے علی بن الحسین (امام زین العابدین (رح)) کی طرف سے بیان کیا کہ ابوبکر، عمر اور علی (رض) کے متعلق یہ آیت نازل ہوئی ہے۔
ونزعنا ما فی صدورہم من غل اخوانا علی سررمتقابلین۔ الحجر : 47 ۔
تو حضرت ابو جعفر (رح) نے فرمایا : اللہ کی قسم ! انہی کے بارے میں نازل ہوئی ہے اور کن کے بارے میں نازل ہوسکتی ہے ان کے سوا ؟ کثیر النوار کہتے ہیں : میں نے کہا : پھر وہ کونسا کھوٹ تھا۔ فرمایا جاہلیت کا کھوٹ تھا۔ بنی تیم بنی عدی اور بنی ہاشم کے درمیان زمانہ جاہلیت میں کچھ (عناد) تھا۔ پھر جب یہ لوگ اسلام لے آئے تو محبت میں سیر و شکر ہوگئے۔ ایک مرتبہ حضرت ابوبکر (رض) کو پہلو میں درد ہوگیا تو حضرت علی (رض) اپنے ہاتھ کو گرم کرکے ابوبکر (رض) کے پہلو کو سینکنے لگے تب یہ آیت نازل ہوئی۔ ابن ابی حاتم، ابن عساکر۔
کلام : ۔۔ ابو جعفر (رح) آل علی (رض) میں سے عظیم بزرگ تھے۔ اور کثیر النواء یہ کثیر بن اسماعیل النواء شیعہ ہے۔ جس کو ابو حاتم اور امام نسائی نے ضعیف قرار دیا ہے۔ ابن عدی کہتے ہیں یہ تشیع میں غلو کرتا تھا۔ سعدی فرماتے ہیں یہ گمراہ انسان تھا۔ دیکھئے میزان الاعتدال 3/402 م 410 ۔