4499: ۔۔ مسند ابی (رض)) حضرت ابی (رض) سے مروی ہے کہ ایک مرتبہ حضرت موسیٰ (علیہ السلام) بنی اسرائیل کے درمیان خطبہ دینے کھڑے ہوئے۔ آپ (صلی اللہ علیہ وآلہ وسلم) نے سوال کیا : لوگوں میں سب سے زیادہ علم والا کون ہے ؟ حضرت موسیٰ (علیہ السلام) نے فرمایا : میں سب لوگوں سے زیادہ علم والا ہوں۔ اللہ پاک حضرت موسیٰ (علیہ السلام) کے اس جواب سے ناراض ہوگئے کہ یہ کیوں نہیں کہا اللہ زیادہ جانتا ہے کہ لوگوں میں کہ کون زیادہ علم والا ہے ؟ پس اللہ تبارک و تعالیٰ نے حضرت موسیٰ (علیہ السلام) کو وحی کی کہ دونوں سمندروں کے سنگم پر میرا ایک بندہ ہے وہ تجھ سے زیادہ جاننے والا ہے۔ حضرت موسیٰ (علیہ السلام) نے عرض کیا : اے پروردگار ! میرے لیے اس سے ملاقات کا کیا ذریعہ ہے ؟ فرمایا : تھیلے میں ایک مچھلی لو۔ (اور سفر پر چل دو ) جہاں وہ مچھلی گم ہوجائے وہی تمہاری منزل ہے۔
چنانچہ حضرت موسیٰ (علیہ السلام) چل دیے اور اپنے ساتھ ایک نوجوان یوشع بن نون کو بھی لے لیا۔ دونوں نے ایک تھیلے میں مچھلی بھی ساتھ کرلی۔ حتی کہ جب وہ ایک چٹان پر پہنچے تو لیٹ کر سو گئے۔ مچھلی تھیلے سے نکل کر سمندر میں چلی گئی۔ اور اس کے جانے کا نشان سمندر میں باقی رہ گیا۔ اسی نشان پر موسیٰ (علیہ السلام) اور یوشع (علیہ السلام) کو بہت تعجب ہوا۔ پھر دونوں باقی دن اور رات سفر کرتے رہے اگلے دن صبح ہوئی تو حضرت موسیٰ (علیہ السلام) نے حضرت یوشع (علیہ السلام) کو فرمایا : ہمارا کھانا لاؤ۔ اس سفر میں بڑی تھکاوٹ ہوگئی ہے۔ اور یہ تھکاوٹ اس مقررہ جگہ سے آگے نکلنے کے بعد پہنچی تھی جس جگہ کا اللہ نے ان کو حکم فرمایا تھا چنانچہ جوان نے جواب دیا کیا آپ نے نہیں دیکھا کہ ہم جب چٹان پر تھے تو میں مچھلی کو بھول گیا تھا۔ حضرت موسیٰ (علیہ السلام) نے فرمایا : اسی مقام کی تو ہم کو تلاش تھی۔ چنانچہ دونوں اپنے نشانات قدم پر واپس لوٹے جب وہ واپس چٹان پر پہنچے تو وہاں ایک شخص کو کپڑا اوڑھے لیٹا ہوا پایا۔ موسیٰ (علیہ السلام) نے سلام کیا۔ حضرت خضر (علیہ السلام) نے فرمایا : تیری سرزمین میں یہ سلام کہاں سے آیا ؟ حضرت موسیٰ (علیہ السلام) نے فرمایا : میں ہوں موسیٰ۔ خضر (علیہ السلام) نے پوچھا : بنی اسرائیل کے موسیٰ ؟ موسیٰ نے فرمایا : جی ہاں۔ میں آپ کے ساتھ رہنا چاہتا ہوں تاکہ جو آپ کو علم سکھایا گیا ہے وہ آپ مجھے بھی سکھا دیں حضرت خضر (علیہ السلام) نے فرمایا : تم میرے ساتھ رہ کر صبر نہیں کرسکتے۔ اے موسیٰ ! میں ایک علم پر ہوں جو اللہ نے مجھے سکھایا ہے جس کو تم نہیں جانتے۔ اور تم بھی اللہ کے علم میں سے ایک علم پر ہو جس کو میں نہیں جانتا۔ حضرت موسیٰ (علیہ السلام) نے فرمایا : تم مجھے ان شاء اللہ صابرین میں سے پاؤگے اور میں آپ کی نافرمانی بھی نہیں کروں گا۔ چنانچہ دونوں ساحل کے کنارے کنارے چلنے لگے راستے میں ایک کشتی ملی کشتی والوں سے بات کی کہ ہم دونوں کو سوار کرلیں۔ چنانچہ کشتی والوں نے حضرت خضر (علیہ السلام) کو پہچان کر بغیر کرائے کے دونوں کو سوار کرلیا۔ ایک چڑیا آئی اور کشتی کے کنارے پر بیٹھ گئی۔ اور سمندر میں ایک یا دو چونچ ماری۔ حضرت خضر (علیہ السلام) نے فرمایا : اے موسیٰ (علیہ السلام) میرا اور تمہارا علم اللہ کے علم کے مقابلے میں ایسا ہے جیسے اس سمندر سے چڑیا نے ایک یا دو چونچ پانی پی لیا ہوگا۔
پھر حضرت خضر (علیہ السلام) نے کشتی کے تختوں میں سے ایک تختہ اکھاڑ دیا۔ حضرت موسیٰ (علیہ السلام) نے فرمایا :
ان لوگوں نے ہم کو بغیر کرائے کے سوار کیا جبکہ آپ نے ان کی کشتی پھاڑ ڈالی تاکہ اس میں سوار لوگ غرق ہوجائیں۔ حضرت خضر (علیہ السلام) نے فرمایا : میں نے نہیں کہا تھا کہ تم میرے ساتھ صبر نہیں کرسکتے ؟ حضرت موسیٰ (علیہ السلام) نے فرمایا : مجھ سے بھول ہوگئی اس پر میرا مواخذہ نہ کیجیے۔ یہ پہلی بار تو حضرت موسیٰ (علیہ السلام) سے بھول ہوئی تھی۔ پھر دونوں چل پڑے۔ دیکھا کہ ایک بچہ بچوں کے ساتھ کھیل کود رہا ہے۔ حضرت خضر (علیہ السلام) نے اوپر سے اس کا سر پکڑا اور گردن توڑ دی۔
حضرت موسیٰ (علیہ السلام) نے فرمایا : تو نے ایک معصوم جان قتل کردی۔ بغیر کسی پاداش کے ۔ حضرت خضر (علیہ السلام) نے فرمایا : میں نے کہا تھا نا کہ تم میرے ساتھ صبر نہیں کرسکوگے۔ پھر دونوں آگے چل پڑے۔ حتی کہ ایک بستی میں پہنچے۔ دونوں حضرات نے بستی والوں سے کھانا پانی طلب کیا۔ لیکن انھوں نے ان دو حضرات کی مہمان نوازی کرنے سے یکسر انکار کردیا۔ پھر دونوں کو ایک دیوار نظر آئی جو قریب تھا ک گرجاتی حضرت خضر (علیہ السلام) نے اپنے ہاتھ کے ساتھ اس دیوار کو سیدھا کردیا۔ حضرت موسیٰ (علیہ السلام) نے فرمایا :
اگر تم چاہو تو اس دیوار ٹھیک کرنے کی اجرت لے سکتے ہو۔ تب حضرت خضر (علیہ السلام) نے فرمایا : پس یہ تمہارا اور میرا فرق کا وقت آگیا ہے۔
حضور (صلی اللہ علیہ وآلہ وسلم) نے ارشاد فرمایا : اللہ پاک موسیٰ (علیہ السلام) پر رحم فرمائیں۔ اگر وہ صبر کرتے تو ہمیں ان کے اور بھی واقعات ملتے۔ (مسند احمد، الحمیدی، بخاری، مسلم، ترمذی، نسائی، ابن خزیمہ، ابو عوانہ، شعب الایمان للبیہقی)