4512: ۔۔ حضرت علی (رض) کا فرمان ہے :
جب موسیٰ (علیہ السلام) نے اپنے پروردگار کے پاس (طور پر) جانے کا ارادہ کیا تو سامری (جادوگر) نے بنی اسرائیل کے جس قدر زیورات ہوسکے جمع کیے اور ان کو ڈھال کر بچھڑے کی شکل بنائی۔ پھر ایک مٹھی اس کے پیٹ میں ڈالی جس سے وہ بچھڑا آواز نکالنے والا بن گیا۔ پھر سامری نے بنی اسرائیلیوں کو کہا :
یہ تمہارا اور موسیٰ کا پروردگار ہے۔
حضرت ہارون (علیہ السلام) نے ان کو کہا : اے لوگو ! کیا پروردگار نے تم سے اچھا وعدہ نہیں کیا۔ چنانچہ جب موسیٰ (علیہ السلام) واپس آئے تو اپنے بھائی ہارون کے سر کو پکر کر کھینچا۔ ہارون (علیہ السلام) نے معذرت کے لیے کہا جو کہا۔ پھر موسیٰ (علیہ السلام) نے سامری کو کہا : تیرا مقصد کیا ہے ؟ سامری نے کہا :
میں نے رسول (جبرئیل (علیہ السلام)) کے نشان (قدم) سے ایک مٹھی لے لی تھی۔ جو میں نے اس بچھڑے میں ڈال دی اور یہ کام کرنے کو میرا دل چاہ رہا تھا۔
پھر موسیٰ نے بچھڑے کو لیا اور نہر کے کنارے لے جا کر اس پر بہت مٹی ڈالی ۔ (پھر لوگوں نے اس نہر کا پانی پیا) اور جب بھی کوئی ایسا شخص اس پانی کو پیتا جس نے بچھڑے کی عبادت کی تھی تو اس کا چہرہ سونے کی طرح زرد ہوجاتا۔ پھر ان لوگوں نے حضرت موسیٰ (علیہ السلام) سے اپنی توبہ کا طریقہ پوچھا۔ حضرت موسیٰ (علیہ السلام) نے فرمایا : ایک دوسرے کو قتل کرکے کفارہ ادا کرو۔ لوگوں نے چھری (اور تلواریں لی) اور ہر ایک اپنے بھائی اور اپنے قریبی کو قتل کرنے لگا اور کوئی پروا نہ کرتا تھا۔ کہ کس کو قتل کررہا ہے۔ (ہر گناہ گار نے گردن جھکا دی تھی اور اس کا قریبی اس کو قتل کرتا تھا۔ )
حتی کہ ستر ہزار لوگ قتل ہوگئے۔ پھر اللہ تعالیٰ نے موسیٰ کو وحی کی : ان کو حکم دو کہ اپنے ہاتھ میں روک لیں پس میں نے قتل ہوجانے والوں کی بخشش کردی اور مرجانے والوں کی توبہ قبول کرلی۔ الفریابی، عبد بن حمید، ابن المنذر، ابن ابی حاتم، مستدرک الحاکم۔