4527: ۔۔ حضرت علی (رض) سے مروی ہے کہ جب حضرت ابراہیم (علیہ السلام) کو بیت اللہ کی تعمیر کا حکم دیا گیا تو آپ (صلی اللہ علیہ وآلہ وسلم) کے ساتھ (ان کے بیٹے اور بیوی یعنی) اسماعیل اور ہاجرہ بھی نکلیں جب مکہ پہنچے تو بیت اللہ کی جگہ ایک بادل کو اپنے سر پر سایہ فگن دیکھا۔ اس بادل میں سر کی مانند کوئی چیز تھی جس نے حضرت ابراہیم (علیہ السلام) سے کلام کیا اور کہا :
اے ابراہیم ! میرے سائے پر بنیاد رکھو یا فرمایا : میری مقدار کے بقدر بنیاد رکھو۔ اس میں زیادتی نہ کرو نہ کمی کرو۔ پھر جب تعمیر مکمل ہوگئی تو حضرت ابراہیم (علیہ السلام) وہاں سے چلے گئے اور اپنے پیچھے حضرت اسماعیل (علیہ السلام) اور ہاجرہ (علیہا السلام) کو چھوڑ گئے۔ اور اسی کی طرف فرمان الہی کا اشارہ ہے :
و اذ بوانا لابراہیم مکان البیت الخ۔ الحج : 26
اور (ایک وقت تھا) جب ہم نے ابراہیم (علیہ السلام) کے لیے خانہ کعبہ کو مقام مقرر کیا (اور ارشاد فرمایا) کہ میرے ساتھ کسی چیز کو شریک نہ کرنا اور طواف کرنے والوں اور قیام کرنے والوں اور رکوع کرنے والوں (اور) سجدہ کرنے والوں کے لیے میرے گھر کو صاف رکھا کرو۔ (ابن جریر، مستدرک الحاکم)