4545: ۔۔ (مسند عمر (رض)) حضرت عمر (رض) فرماتے ہیں :
موسیٰ (علیہ السلام) جب مدین تشریف لائے اور وہاں پانی پر پہنچے تو لوگوں کو دیکھا کہ جانوروں کو پانی پلا رہے ہیں۔ پھر لوگوں نے پانی پلا کر مل کر پتھر کی چٹان سے کنوئیں کا منہ بند کیا۔ جس کو دس آدمی مل کر ہی اٹھاسکتے تھے۔ اس کے بعد حضرت موسیٰ (علیہ السلام) نے دیکھا کہ دو عورتیں پیچھے رہ گئی ہیں۔ حضرت موسیٰ (علیہ السلام) نے ان سے پوچھا تمہارا کیا مقصد ہے ؟ انھوں نے عرض کیا کہ ہم بھی جانوروں کو پانی پلانے آئی ہیں۔ چنانچہ حضرت موسیٰ (علیہ السلام) نے جا کر اکیلے ہی وہ پتھر کنوئیں کے منہ سے ہٹایا پھر پانی کھینچا اور ایک ہی ڈول میں سب بکریوں کو سیراب کردیا۔ دونوں عورتیں لوٹ گئیں اور اپنے باپ کو سارا واقعہ بیان کیا۔ جبکہ موسیٰ (علیہ السلام) سائے میں بیٹھ گئے اور خدا سے دعا کی :
رب انی لما انزلت الی من خیر فقیر۔ القصس
اے پروردگار ! میں جو تو میری طرف اتارے اس کا محتاج ہوں۔
چنانچہ ان دونوں میں سے ایک لڑکی شرم و حیاء کی پیکر چلتی ہوئی آئی۔ جس نے اپنے چہرے کو کپڑے کے ساتھ ڈھانک رکھا تھا۔ اور عام بےباک عورتوں کی طرح نہ تھی جو دھڑے کے ساتھ آتی جاتی ہیں۔ آ کر اس نے کہا :
قالت ان ابی یدعوک لیجزیک اجر ما سقیت لنا۔ القصص۔
بولی : میرا باپ تجھے بلاتا ہے تاکہ تجھے بدلہ دے اس کا جو تو نے (پانی) پلایا ہمارے لیے (جانوروں کو)
چنانچہ حضرت موسیٰ (علیہ السلام) کھڑے ہو کر اس کے ساتھ چل دیے اور اس کو فرمایا میرے پیچھے پیچھے چلتی آؤ اور مجھے بول کر راستہ بتاتی جاؤ، کیونکہ مجھے اچھا نہیں لگتا کہ ہوا سے تمہارے کپڑے اڑے اور تمہارے جسم کی نمائش کردے۔ پس جب وہ اپنے باپ کے پاس پہنچی تو اس کو سارا واقعہ بیان کیا۔ پھر :
فقالت احدھما یا ابت استاجرہ ان خیر من استاجرت القوی الامین۔
ان میں سے ایک بولی ! اے اباجان ! اس کو اجرت پر رکھ لو۔ بیشک جس کو آپ اجرت پر رکھیں اس میں قوی (اور) امانت دار زیادہ بہتر ہے۔
لڑکی کے باپ (حضرت شعیب (علیہ السلام)) بولے : اے بیٹی ! تجھے اس کی امانت اور قوت کا کیسے اندازہ ہوا ؟ لڑکی بولی : قوت کا اندازہ تو ان کے پتھر اٹھانے سے ہوا۔ جس کو کم سے کم دس آدمی اٹھاسکتے ہیں۔ اور ان کی امانت تو انھوں نے مجھے کہا تھا : میرے پیچھے پیچھے چلی آؤ اور راستہ بتاتی جاؤ۔ مجھے ناپسند ہے کہ ہوا سے کپڑا اڑ کر تمہارا جسم (مجھے) دکھائی دے۔
چنانچہ حضرت شعیب (علیہ السلام) کو اس وجہ سے حضرت موسیٰ (علیہ السلام) میں اور زیادہ رغبت ہوگئی۔ لہٰذا انھوں نے فرمایا :
انی ارید ان انکحک احدی ابنتی ھاتین ۔۔۔ سے ۔۔۔ ستجدنی ان شاء اللہ من الصالحین۔ تک۔ القصص : 27
میں ارادہ کرتا ہوں کہ تمہارا نکاح کردوں اپنی ان دو بیٹیوں میں سے ایک سے۔ اس پر کہ تم میری مزدوری کرو آٹھ سال، اگر تم دس پورے کردو تو یہ (بھلائی) تمہاری طرف سے ہے۔ اور میں نہیں چاہتا کہ تم پر مشقت ڈالوں۔ (حضرت موسیٰ (علیہ السلام) نے کہا) آپ مجھے ان شاء اللہ نیکوں میں سے پائیں گے۔ یعنی اچھی صحبت اور اپنے کہے ہوئے وعدہ پر پابند پائیں گے۔
قال ذلک بینی و بینک ایما الاجلین قضیت فلا عدوان علی۔
کہا (موسیٰ (علیہ السلام) نے) یہ میرے اور آپ کے درمیان (طے پایا) ہے دونوں مدتوں میں سے جو میں پوری کروں مجھ پر کوئی زیادتی نہیں۔
حضرت شعیب (علیہ السلام) نے فرمایا : ٹھیک ہے۔
واللہ علی ما نقول وکیل۔ القصص۔
اور اللہ علی ما نقول وکیل۔ القصص۔
اور اللہ اس پر جو ہم نے معاہدہ کیا وکیل ہے۔
چنانچہ حضرت شعیب (علیہ السلام) نے حضرت موسیٰ (علیہ السلام) کی شادی کردی۔ حضرت موسیٰ (علیہ السلام) ان کے ساتھ ٹھہرے اور ان کا کام کرتے رہے۔ بکریوں کی چرواہی اور دوسری گھریلو مصروفیات۔ آپ کی شادی (چھوٹی) بیٹی صفورہ سے کی جبکہ اس کی (بڑی) بہن مشرقا تھی۔ یہی دونوں پہلے اپنی بکریوں کو چرایا کرتی تھیں۔ (الفریابی، ابن ابی شیبہ عبد بن حمید، ابن المنذر، ابن ابی حاتم، مستدرک الحاکم، السنن للبیہقی)