45501 تم سے پہلی امتوں میں ایک عبادت گزار آدمی تھا وہ گرجے کا پجاری تھا اسے جریج کہا جاتا تھا اس کی ماں زندہ تھی وہ اس کے پاس آکر اسے آواز دیتی جریج گرجے سے جھانک لیتا اور ماں سے باتیں کرتا۔ ایک دن ماں اس کے پاس آئی وہ نماز میں مصروف تھا، ماں نے جریج کو آواز دینی شروع کی ہاتھ پیشانی پر رکھا اور زور سے آواز دی۔ اے جریج، اے جریج تین بار آواز دی۔ ہر پکار کے بدلہ میں جریج کہتا اے میرے رب ! میں اپنی ماں کو جواب دوں یا نماز پڑھوں۔ اتنے میں ماں کو غصہ آیا اور کہنے لگی : اے اللہ اس وقت تک جریج کو موت نہ آئے جب تک وہ فاجرہ عورتوں کے چہرے نہ دیکھ لے۔ چنانچہ اس بستی کے بادشاہ کی بیٹی بالغ ہوچکی تھی اور اسے (حرام کا) حمل ٹھہر چکا تھا اس نے لڑکا جنم دیا لوگوں نے لڑکی سے پوچھا : یہ برا فعل تیرے ساتھ کس نے کیا ہے ؟ لڑکی نے جواب دیا : گرجے کے راہب جریج نے ایسا کیا ہے۔ چنانچہ لوگوں نے جریج کے گرجے پر چڑھائی کردی اور کلہاڑوں سے گرجا گرانا شروع کردیا۔ جریج نے لوگوں سے پوچھا : تمہاری ہلاکت تمہیں ہوا ؟ لوگوں نے اسے کوئی جواب نہ دیا : جب اس نے یہ حالت دیکھی فوراً ایک رسی کے ذریعے لٹک کر گرجے سے نیچے اترا لوگوں نے اسے بےعزت کرنا شروع کیا اور پٹائی کرنے لگے اور کہتے ہیں تم ریاکار ہو لوگوں کو دھوکا دے رہے ہو ۔ جریج نے کہا : تمہاری ہلاکت مجھے بتاؤ تو سہی تمہیں کیا ہوا لوگوں نے کہا : بستی کے سردار کی بیٹی جو کہ بادشاہ کی بیٹی ہے اسے تو نے حاملہ کردیا ہے۔ جریج نے کہا : میں نے ایسا نہیں کیا۔ لوگوں نے کہا : لڑکی نے ایک لڑکا جنم دیا ہے جریج بولا : لڑکا زندہ ہے ؟ لوگوں نے اثبات میں جواب دیا جریج نے کہا : مجھے ساتھ لے کر واپس چلو لوگ واپس ہوئے جریج نے دو رکعتیں پڑھیں پھر بستی میں ایک درخت کے پاس پہنچا اس نے ایک ٹہنی لی اور پھر لڑکے کے پاس آیا بچہ گود میں تھا جریج نے مذکورہ ٹہنی بچے کو ماری اور ساتھ کہا : اے سرکش عورت کے بیٹے تیرا باپ کون ہے ؟ لڑکا بولا : فلاں چرواہا میرا باپ ہے۔ لوگوں نے جریج سے کہا : تم اگر چاہو تو تمہارا گرجا سونے کا ہم بنا ڈالیں ، اگر چاہو تو چاندی کا بنا ڈالیں : جریج نے کہا : جیسا تھا ویسے ہی بنادو۔۔ رواہ الطبرانی عن عمران بن حصین والطبرانی فی الاوسط عن ابی حرب بن ابی الاسود