4560: ۔۔ (مسند فردوس بن مسیک عظیفی ثم المرادی (رض)) فروہ غطیفی (رض) فرماتے ہیں میں حضور اکرم (صلی اللہ علیہ وآلہ وسلم) کی خدمت میں حاضر ہوا اور عرض کیا : یا رسول اللہ ! کیا میں اپنی قوم کے پیٹھ دینے والوں سے قتال نہ کروں ان لوگوں کو لے کر جو ان میں سے سامنے آئیں۔ (اور میرے ساتھ مل جائیں) آپ (صلی اللہ علیہ وآلہ وسلم) نے ارشاد فرمایا : کیوں نہیں ضرور کرو۔ فروہ کہتے ہیں پھر میرے دل میں یہ بات آئی اور میں نے عرض کیا : نہیں، وہ تو اہل سباء ہیں۔ وہ بڑی طاقت اور قوت والے ہیں۔ لیکن آپ (صلی اللہ علیہ وآلہ وسلم) نے مجھے اس کا حکم فرمایا اور ان سے لڑنے کی اجازت دی۔
چنانچہ میں رسول اللہ (صلی اللہ علیہ وآلہ وسلم) کے پاس سے نکلا تو اللہ پاک نے آپ پر (قوم) سبا کے بارے میں (سورة سبا کی صورت میں) نازل فرمایا جو نازل فرمایا۔ پھر آپ (صلی اللہ علیہ وآلہ وسلم) نے فرمایا : غطیفی نے کیا کیا ؟ پھر آپ (صلی اللہ علیہ وآلہ وسلم) نے میری طرف بلانے والے کو بھیجا۔ قاصد نے مجھے دیکھا کہ میں سوار ہوچکا ہوں۔ پھر اس نے مجھے واپس چلنے کو کہا۔ میں رسول اکرم (صلی اللہ علیہ وآلہ وسلم) کی خدمت میں پہنچا تو آپ کو اپنے صحابہ (رض) کے درمیان بیٹھا ہوا پایا۔ آپ (صلی اللہ علیہ وآلہ وسلم) نے (مجھے) ارشاد فرمایا : (پہلے) قوم کو دعوت دو ۔ جو تمہاری دعوت قبول کرلیں تم (ان کا اسلام) قبول کرو اور جو انکار کریں تم ان پر جلدی نہ کرو حتی کہ مجھے آ کر بیان نہ کرو۔ پھر قوم میں سے ایک شخص نے پوچھا : یا رسول اللہ ! یہ سبا کیا ہے ؟ کسی زمین کا نام ہے یا کسی عورت کا ہے۔ آپ (صلی اللہ علیہ وآلہ وسلم) نے فرمایا :
سبا زمین ہے اور نہ کوئی عورت بلکہ سبا ایک مرد تھا۔ جس کے ہاں دس عرب لڑکے پیدا ہوئے۔ چھ دائیں طرف یمن اور اس کی اطراف میں سدھار گئے اور چار بائیں طرف ملک شام چلے گئے۔ چار جو ملک شام گئے وہ لخم، جذام، غسان اور عاملہ تھے۔ اور ملک یمن گئے وہ ازد، کندہ، حمیر، اشعریون، انمار اور مذحج تھے۔ ایک شخص نے عرض کیا : یا رسول اللہ ! انما کون ہیں ؟ فرمایا : جن سے خثعم اور بجیلہ قبائل ہیں۔ (ابن سعد، مسند احمد، ابو داود، ترمذی حسن غریب، الکبیر للطبرانی، مستدرک الحاکم)