45735 سبرہ کی روایت ہے کہ ہم رسول کریم (صلی اللہ علیہ وآلہ وسلم) کے ساتھ مدینہ سے حجۃ الوداع کے لیے روانہ ہوئے حتیٰ کہ جب ہم عسفان پہنچے رسول کریم (صلی اللہ علیہ وآلہ وسلم) نے فرمایا : عمرہ حج میں داخل ہوچکا ہے۔ سراقہ مالک (رض) نے آپ (صلی اللہ علیہ وآلہ وسلم) سے عرض کیا : یارسول اللہ ! ہمیں ایسی قوم جیسی دعوت دیجئے گویا کہ وہ آج ہی پیدا ہوئی ہو، ہمارا عمرہ اسی سال کے لیے ہے یا ہمیشہ ہمیشہ کے لیے ؟ آپ (صلی اللہ علیہ وآلہ وسلم) نے فرمایا : بلکہ ہمیشہ ہمیشہ کے لیے ہے۔ چنانچہ جب ہم مکہ پہنچے تو ہم نے بیت اللہ کا طواف کیا اور صفاء مروہ کے درمیان چکر لگایا پھر آپ (صلی اللہ علیہ وآلہ وسلم) نے ہمیں عورتوں کے ساتھ متعہ کرنے کا حکم دیا، ہم آپ (صلی اللہ علیہ وآلہ وسلم) کے ؟ پاس واپس لوٹے اور عرض کیا یارسول اللہ ! عورتیں تو متعہ کرنے سے انکار کررہی ہیں۔ الایہ کہ مقرر مدت تک کیا جائے ارشاد فرمایا : چلو ایسا ہی کرلو۔ چنانچہ میں اور میرا ایک ساتھی جس پر عمدہ چادر تھی چل پڑے اور ایک عورت کے پاس داخل ہوئے ہم نے اپنے آپ کو اس کے سامنے پیش کیا۔ عورت نے میرے ساتھی کی چادر کی طرف دیکھنا شروع کردیا وہ اس کی چادر کو میری چادر سے عمدہ سمجھتی تھی۔ اس نے پھر میری طرف دیکھا اور مجھے اس سے زیادہ جوانی میں سمجھنے لگی۔ کہنے لگی : چادر کے بدلہ میں چادر۔ بہرحال اس نے میرا انتخاب کیا۔ میں نے چادر کے بدلہ میں اس کے ساتھ شادی (متعہ) کرلی۔ میں نے اس کے ہاں رات گزاری صبح ہوتے ہی میں مسجد کی طرف چل دیا کیا دیکھتا ہوں رسول کریم (صلی اللہ علیہ وآلہ وسلم) منبر پر خطاب فرما رہے ہیں چنانچہ میں نے آپ (صلی اللہ علیہ وآلہ وسلم) کو ارشاد فرماتے ہوئے سنا کہ : جس شخص نے مقررہ مدت تک کسی عورت سے شادی کرلی ہو اسے چاہیے کہ طے شدہ مہر اس کے پسرد کردے اور پھر دیئے ہوئے مہر سے کچھ بھی واپس نہ لے چونکہ متعہ کو اللہ تعالیٰ نے تاقیامت حرام کردیا ہے۔ رواہ عبدالرزاق