45804 حضرت سہل بن سعد ساعدی (رض) کی روایت ہے کہ ایک عورت نبی کریم (صلی اللہ علیہ وآلہ وسلم) کی خدمت میں حاضر ہوئی اور اپنی ذات کو نبی کریم (صلی اللہ علیہ وآلہ وسلم) کے حضور پیش کیا۔ آپ (صلی اللہ علیہ وآلہ وسلم) خاموش رہے۔ اس نے پھر اپنے آپ کو آپ (صلی اللہ علیہ وآلہ وسلم) کے لیے پیش کیا آپ (رض) پھر خاموش رہے میں نے اس عورت کو تھوڑی دیر کھڑے دیکھا کہ وہ اپنے تئیں آپ (صلی اللہ علیہ وآلہ وسلم) کو پیش کررہی تھی لیکن آپ (صلی اللہ علیہ وآلہ وسلم) بدستور خاموش رہے۔ اتنے میں ایک آدمی کھڑا ہوا میرے خیال میں وہ انصار سے تھا کہنے لگا : یارسول اللہ اگر آپ کو اس عورت سے شادی کرنے کی حاجت نہیں تو میری شادی کرادیں۔ آپ (صلی اللہ علیہ وآلہ وسلم) نے فرمایا : تمہارے پاس کوئی چیز ہے ؟ عرض کیا : یارسول اللہ (صلی اللہ علیہ وآلہ وسلم) ! میرے پاس کچھ بھی نہیں ہے۔ حکم ہوا۔ جاؤ تلاش کرو شاید کوئی چیز مل جائے گو کہ لوہے کی انگوٹھی ہی کیوں نہ ہو۔ چنانچہ وہ آدمی چلا گیا اور پھر واپس لوٹ آیا کہنے لگا بخدا ! میں نے اس کپڑے کے سوا کچھ نہیں پایا جسے میں اپنے اور اس عورت کے درمیان نصف نصف کردوں گا۔ رسول کریم (صلی اللہ علیہ وآلہ وسلم) نے فرمایا ! یہ کپڑا تمہیں کس طرح بےنیاز نہیں کرتا ہے۔ کیا تمہیں قرآن مجید میں سے کچھ یاد ہے ؟ عرض کیا : جی ہاں۔ حکم ہوا کیا ؟ ۔ عرض کیا : فلاں اور فلاں سورتیں مجھے یاد ہیں۔ آپ (صلی اللہ علیہ وآلہ وسلم) نے فرمایا : جاؤ میں نے یہ عورت تمہارے پاس موجود قرآن کی وجہ سے تمہارے ملک میں دے دی چنانچہ میں نے وہ آدمی چلتا ہوا دیکھا اور وہ عورت بھی اس کے پیچھے پیچھے جارہی تھی۔ رواہ عبدالرزاق