4582: ۔۔ عثمان بن عفان (رض) سے مروی ہے : فرماتے ہیں میں نے رسول اکرم (صلی اللہ علیہ وآلہ وسلم) سے اللہ عزوجل کے اس فرمان کا مطلب دریافت کیا :
لہ مقالید السموات والارض۔ الزمر۔
آسمانوں اور زمین کی چابیاں اللہ ہی کے لیے ہیں۔
آسمان و زمین کی چابیاں
حضور (صلی اللہ علیہ وآلہ وسلم) نے مجھے ارشاد فرمایا :
اے عثمان ! تم نے مجھ سے ایسا سوال کیا ہے جو تم سے پہلے کسی نے نہیں کیا تھا۔ آسمانوں اور زمین کی چابیاں یہ کلمات ہیں :
لا الہ الا اللہ، واللہ اکبر، و سبحان اللہ، والحمد للہ، واستغفر اللہ الذی لا الہ الا ھو الاول والآخر والظاھر والباطن، یحییٰ و یمیت وھو حی لا یموت، بیدہ الخیر، وھو علی کل شیء قدیر۔
اے عثمان ! جو شخص دن میں سو مرتبہ یہ کلمات پڑھ لے، اس کو دس خصلتیں (خوبیاں) عطا کی جائیں گی۔
پہلی اس کے تمام پچھلے گناہ معاف کردیے جائیں گے۔
دوسری جہنم کی آگ سے اس کے لیے آزادی لکھ دی جائے گی۔
تیسری دو فرشتے نگہبان اس پر مقرر کردیے جائیں گے، جو دن و رات تمام آفات اور بلیات سے اس کی حفاظت کریں گے۔
چوتھی اس کو ایک قنطار (ہزار اوقیہ) اجر عطا کیا جائے گا۔
پانچویں اس شخص کا اجر اس کو ملے گا جس نے حضرت اسماعیل (علیہ السلام) کی اولاد میں سے سو غلام آزاد کیے۔
چھٹی اس کو ایسا اجر ملے گا گویا اس نے توراۃ ، انجیل ، زبور اور قرآن پڑھ لیے۔
ساتویں اس کے لیے جنت میں گھر بنایا جائے گا۔
آٹھویں حور عین سے اس کی شادی کردی جائے گی۔
نویں اس کے سر پر وقار کا تاج پہنا دیا جائے گا۔
دسویں یہ کہ اس کے گھر کے افراد میں سے ستر افراد کے حق میں سفارش قبول کی جائے گی۔
پھر آپ (صلی اللہ علیہ وآلہ وسلم) نے فرمایا :
اے عثمان ! اگر ہوسکے تو زندگی میں کسی دن یہ کلمات فوت نہ ہونے دینا۔ تو ان کی بدولت کامیاب ہونے والوں کے ساتھ مل جائے گا اور اولین و آخرین کو پالے گا۔ (ابن مردویہ، اوب یعلی و ابن ابی عاصم و ابو الحسن القطان فی الطولات، السنن لیوسف القاضی، ابن المنذر، ابن ابی حاتم، ابن السنی، عقیلی فی الضعفاء، البیہقی فی الاسماء والصفات) ۔
یہی روایت دوسرے الفاظ میں یوں منقول ہوئی ہے :
جس شخص نے یہ کلمات صبح و شام دس دس بار کہے اس کو چھ خصلتیں (خوبیاں) عطا کی جائیں گی۔
پہلی ابلیس اور اس کے لشکر سے اس کی حفاظت کردی جائے گی۔
دوسری ایک قنطار اجر اس کو دیا جائے گا۔
تیسری ایک درجہ جنت میں بلند کیا جائے گا۔
تیسری ایک درجہ جنت میں بلند کیا جائے گا۔
چوتھی حور عین سے اس کی شادی کردی جائے گی۔
پانچویں اس کے پاس بارہ ہزار اور ایک روایت میں بارہ فرشتے حاضر ہوں گے۔
اور چھٹے یہ کہ اس کو اس شخص کا اجر ہوگا جس نے توراۃ ، انجیل، زبور اور قرآن پاک کی تلاوت کی۔
اور اے عثمان ! اس کے ساتھ اس کو اس شخص کا اجر ہوگا جس نے حج اور عمرہ کیا اور دونوں مقبول ہوگئے۔ اور اگر وہ شخص اسی دن مرگیا تو شہداء کے ساتھ اٹھایا جائے گا۔
کلام : ۔۔۔ امام عقیلی (رح) فرماتے ہیں اس روایت کی سند میں نظر ہے۔ امام منذری (رح) فرماتے ہیں اس میں نکارت ہے۔ جبکہ امام الجوزی (رح) نے اس روایت کو موضوعات میں شمار کیا ہے۔ علامہ ذہبی (رح)۔ میزان میں فرماتے ہیں : میرے خیال میں یہ روایت موضوع (خود ساختہ) ہے۔ امام ابو خیری (رح) فرماتے ہیں اس کے متعلق موضوع ہونے کا کلام کچھ بعید نہیں۔ کنز العمال ج 2 ص 493 ۔