4587: ۔۔ عبدالقدوس حضرت نافع (رح) عن عمر (رض) کی سند سے حضرت عمر بن خطاب (رض) سے روایت کرتے ہیں، حضرت عمر بن خطاب (رض) فرمان باری تعالیٰ :
وقالوا قلوبنا فی اکنۃ ممن تدعونا الیہ۔ فصلت : 5
اور کہنے لگے : کہ جس چیز کی طرف تم ہمیں بلاتے ہو اس سے ہمارے دل پردوں میں ہیں۔ کے (شان نزول) کے متعلق فرماتے ہیں۔
ایک مرتبہ قریش اکٹھے ہو کر نبی اکرم (صلی اللہ علیہ وآلہ وسلم) کے پاس جمع ہو کر آئے۔ آپ (صلی اللہ علیہ وآلہ وسلم) نے ان کو فرمایا : تمہیں اسلام قبول کرنے سے کیا چیز رکاوٹ ہے ؟ حالانکہ تم اسلام کی بدولت عرب کے سردار بن جاؤگے۔ مشرکین کہنے لگے : جو آپ کہہ رہے وہ ہماری سمجھ میں آتا ہی نہیں۔ اور نہ ہم کو وہ سنائی دیتا ہے۔ بلکہ ہمارے دلوں پر تالے پڑے ہوئے ہیں۔ پھر ابوجہل نے کپڑا لے کر اپنے اور حضور (صلی اللہ علیہ وآلہ وسلم) کے درمیان تان لیا۔ اور کہنے لگا : اے محمد ! ہمارے دل پردے میں ہیں اس سے جس کی طرف تم ہم کو بلاتے ہو۔ اور ہمارے کانوں میں بوجھ ہے اور ہمارے اور تمہارے درمیان پردہ ہے۔
نبی اکرم (صلی اللہ علیہ وآلہ وسلم) نے فرمایا : میں تم کو دو باتوں کی طرف بلاتا ہوں یہ کہ تم شہادت دیدو کہ اللہ کے سوا کوئی معبود نہیں وہ تنہاء ہے اس کا کوئی ساتھی نہیں۔ اور میں اللہ کا رسول ہوں۔ جب انھوں نے لا الہ الا اللہ کی شہادت سنی تو نفرت کرتے ہوئے پیٹھ پھیر کر چل دیے اور کہنے لگے کہ کیا تمام معبودوں کو ایک ہی معبود بنالیں یہ تو بڑی عجیب بات ہے۔ پھر وہ ایک دوسرے کو کہنے لگے چلو اور صبر کرو اپنے ہی معبودوں پر یہ تو ایسی چیز مانگی جاتی ہے جو آخرت ملت (نصرانیت) میں بھی نہیں تھی۔ یہ بالکل بنائی ہوئی بات ہے۔ کیا ہم سب میں سے اسی پر نصیحت (کی کتاب) اتری ہے ؟
پھر جبرائیل (علیہ السلام) نازل ہوئے اور کہنے لگے : اے محمد ! اللہ آپ کو سلام کہتا ہے۔ اور فرماتا ہے کہ کیا خیال کرتے ہیں ان کے دلوں پر پردہ ہے اور ان کے کانوں میں بوجھ ہے پس وہ آپ کی بات نہیں سنتے یہ کیسے ہوسکتا ہے حالانکہ جب آپ قرآن میں اللہ یکا کا ذکر کرتے ہیں تو نفرت کرتے ہوئے پیٹھ پھیر کر چل دیتے ہیں، اگر وہ اپنی بات میں سچے ہوتے تو اللہ کا یکتا ذکر سن کر نہ بھاگتے درحقیقت یہ لوگ سنتے تو ہیں لیکن اس سے نفع نہیں اٹھاسکتے کیونکہ وہ اس کو ناپسند کرتے ہیں۔
حضرت عمر (رض) فرماتے ہیں چنانچہ جب اگلا دن ہوا تو انہی میں سے ستر افراد آپ (صلی اللہ علیہ وآلہ وسلم) کی خدمت میں آئے اور کہنے لگے ہم پر اسلام پیش کیجیے۔ چنانچہ آپ (صلی اللہ علیہ وآلہ وسلم) نے ان پر اسلام پیش کیا تو وہ سب کے سب اسلام لے آئے۔ حضور (صلی اللہ علیہ وآلہ وسلم) (خوشی سے) مسکرائے اور اللہ کی حمد بیان کی پھر فرمایا : کل تو تمہارا خیال تھا کہ تمہارے دلوں پر تالا پڑا ہوا ہے اور تمہارے دل پر پردے ہیں اس چیز سے جس کی طرف میں تم کو بلاتا ہوں۔ اور تمہارے کانوں میں بوجھ ہے۔ اور (الحمد للہ) آج تم مسلمان ہوگئے ہو۔ وہ لوگ کہنے لگے : یا رسول اللہ ! ہم کل کو جھوٹ بول رہے تھے۔ اللہ کی قسم اگر وہ سچ ہوتا تو ہم کبھی ہدایت نہ پاسکتے تھے۔ لیکن اللہ پاک ہی سچا ہے اور بندے اس پر جھوٹ بولتے ہیں۔ وہ غنی ہے اور ہم فقیر ۔ (ابو سہل السری بن سہل اجندی سابوری فی الخامس من حدیثہ)