45860 کہمس ہلالی کی روایت ہے کہ ایک مرتبہ ہم حضرت عمر (رض) کے پاس بیٹھے ہوئے تھے اچانک ایک عورت آئی اور آپ (رض) کے پاس بیٹھ گئی اور کہنے لگی : اے امیر المومنین میرے شوہر کی برائی بڑھرہی ہے اور بھلائی میں کمی آرہی ہے۔ حضرت عمر (رض) نے فرمایا : تمہارا سو ہر کون ہے وہ بولی : ابوسلمہ میرا شوہر ہے۔ فرمایا : اس شخص کو تو نبی کریم (صلی اللہ علیہ وآلہ وسلم) کی محبت کا شرف حاصل ہے یہ تو سچا آدمی ہے۔ پھر حضرت عمر (رض) نے اپنے پاس بیٹھے ہوئے ایک آدمی نے پوچھا : کیا بات ایسی ہی نہیں ہے ؟ وہ بولا : اے امیر المومنین ! ہم تو ابوسلمہ کو نہیں پہچانتے مگر اسی طرح جیسے آپ نے کہا ہے۔ آپ (رض) نے اس شخص سے کہا : کھڑے ہوجاؤ اور ابوسلمہ کو بلالاؤ۔ اس دوران عورت اٹھی اور حضرت عمر (رض) کے پیچھے جابیٹی، تھوڑی دیر گزری تھی کہ وہ دونوں آگئے اور حضرت عمر (رض) کے روبرو بیٹھ گئے، حضرت عمر (رض) نے فرمایا : یہ عورت جو میرے پیچھے بیٹھی ہوئی ہے کیا کہتی ہے ؟ ابو سلمہ بولے : اے امیر المومنین ! یہ کون عورت ہے ؟ فرمایا کہ یہ تمہاری بیوی ہے۔ عرض کیا کہ یہ کیا کہنا چاہتی ہے ؟ فرمایا : اس کا دعویٰ ہے کہ تمہاری بھلائی کم ہورہی ہے اور برائی بڑھ رہی ہے، ابوسلمہ (رض) نے جواب دیا : اے امیر المومنین ! اس نے جو کچھ کہا بہت برا کہا حالانکہ یہ بہت ساری عورتوں سے زیادہ بہتر اور اچھے حال میں ہے چنانچہ بقیہ عورتوں کی بنسبت اس کے پاس زیادہ کپڑے ہیں اور گھریلو آسودگی بھی اسے زیادہ حاصل ہے لیکن اس کا خاوند بوسیدہ (یعنی بوڑھا) ہوچکا ہے۔ حضرت عمر (رض) نے عورت سے کہا : تم کیا کہتی ہو ؟ وہ بولی : ابوسلمہ نے جو کچھ کہا ہے سچ کہا ہے۔ حضرت عمر (رض) اٹھے اور ڈانڈا لے کر عورت کی پٹائی کردی اور پھر فرمایا : اے اپنی ذات کی دشمن ! تو نے اس کا مال بھی کھالیا اور اس کا شباب بھی فنا کردیا اور پھر تم نے اس کے متعلق ایسی باتیں کرنا شروع کردی ہیں جو اس میں نہیں ہیں۔ بولی : اے امیر المومنین ! جلدی نہ کریں مجھے کچھ کہنے دیں۔ بخدا ! میں اس مجلس میں کبھی بھی نہیں بیٹھوں گی حضرت عمر (رض) نے عورت کے لیے تین کپڑوں کا حکم دیا اور فرمایا : جو کچھ میں نے تمہارے ساتھ کیا ہے اس کے بدلہ میں یہ کپڑے لو اور اپنے بوڑھے شوہر کی شکایت سے گریز کرو۔ کہمس ھلالی کہتے ہیں گویا کہ میں ابھی اس عورت کو اٹھ کر جاتے ہوئے دیکھ رہاہوں کہ اس کے پاس کپڑے بھی ہیں۔ پھر ابوسلمہ کی طرف متوجہ ہو کر فرمایا : میرے اس اقدام کی وجہ سے تم نے عورت کے ساتھ برائی نہیں کرنی : عرض کیا : میں ایسا نہیں کروں گا چنانچہ دونوں میاں بیوی واپس لوٹ گئے۔ اس کے بعد حضرت عمر (رض) نے رسول کریم (صلی اللہ علیہ وآلہ وسلم) کا ارشاد نقل کرتے ہوئے فرمایا کہ میری امت کا سب سے بہترین زمانہ میرا ہے پھر دوسرا اور تیسرا زمانہ اچھا ہے پھر ایسے لوگ آجائیں گے جن کی قسمیں ان کی شہادتوں پر سبقت لے جائیں گی ان سے گواہی کا مطالبہ نہیں ہوگا پھر بھی وہ گواہی دیں گے اور وہ بازاروں میں شور مچاتے ہوں گے۔۔ رواہ ابوداؤد الطیالسی والبخاری فی تاریخہ والحاکم فی الکنی وقال ابن حجر اسنادہ قوی