45881 ابوعثمان کی روایت ہے کہ ایک مرتبہ میں اور ابوسلیمان باہلی حضرت بن خطاب (رض) کی خدمت میں حاضر ہوئے۔ ابوسلیمان نے نئی نئی شادی کی ہوئی تھی حضرت عمر (رض) نے ابوسلیمان سے فرمایا : تم نے اپنی بیوی کو کیسا پایا ؟ پھر کہا جب تم جنابت کی حالت میں ہوتے ہو اور پھر سونے کا ارادہ ہو اس وقت تم کیا کرتے ہو ؟ ابوسلیمان نے کہا : آپ ہی مجھے بتائیں اس وقت مجھے کیا کرنا چاہیے۔ حضرت عمر (رض) نے فرمایا : جب تم اپنی بیوی کی پاس جاؤ اور پھر تمہارا سونے کا ارادہ ہو تو اپنی شرمگاہ اور ہاتھ نہ منہ دھولو۔ پھر حضرت عمر (رض) نے ابوسلیمان کے ساتھ سر گوشی کی۔ جب ہم حضرت عمر (رض) کے پاس سے اٹھ کر چلے گئے تو میں نے ابوسلیمان سے کہا : امیر المومنین نے تمہارے ساتھ کیا سرگوشی کی تھی ؟ ابوسلیمان نے کہا : امیر المومنین نے مجھے کہا جب تم اپنے گھر والوں کے پاس جاؤ (یعنی ہمبستری کرو) اور پھر تمہارا ہمبستری کرنے کا ارادہ ہو تو اپنی شرمگاہ ہاتھ اور منہ دھولو اور پھر ہمبستری کرلو۔ ہم نے ابوالمستہل کے پاس اس بات کا تذکرہ کیا وہ بولے : ہم نے ابوسعید (رض) کے پاس اس حدیث کا تذکرہ کیا انھوں نے جواب دیا تھا کہ رسول کریم (صلی اللہ علیہ وآلہ وسلم) کا ارشاد ہے کہ تم میں سے جو شخص اپنی بیوی کے پاس (ہمبستری کے لئے) جائے وہ دوبارہ اس وقت تک ہمبستری نہ کرے جب تک شرمگاہ دھونہ لے۔ رواہ المحاملی وابن ابی شیبہ