45921 قتادہ کی روایت ہے کہ حضرت عمر (رض) کی خدمت میں ایک عورت حاضر ہوئی اور کہنے لگی : میرا شوہر رات بھر عبادت میں مصروف رہتا ہے اور دن کو روزہ رکھتا ہے حضرت عمر (رض) نے فرمایا : کیا تم مجھے حکم دیتی ہو کہ میں اسے رات کے قیام اور دن کے روزے سے منع کروں۔ عورت واپس چلی گئی جب پھر واپس آئی وہی بات دھرائی حضرت عمر (رض) نے بھی آگے سے وہی پہلا جواب دیا۔ حضرت عمر (رض) سے کعب بن سور نے کہا : امیر المومنین ! اس عورت کا حق ہے۔ فرمایا : وہ کیسے : کعب نے کہا : چونکہ اللہ تعالیٰ نے اس مرد کے لیے چار عورتیں حلال کی ہیں لہٰذا چار میں سے ایک کا حصہ تو اسے دے لہٰذا چار راتوں میں سے ایک رات بیوی کے لیے مقرر کرے اور چار دنوں میں سے ایک دن اس کے لیے مقرر کرے چنانچہ حضرت عمر (رض) نے اس عورت کے شوہر کو اپنے پاس بلایا اور اسے حکم دیا کہ چار راتوں میں سے ایک رات اپنی بیوی کے پاس گزارو اور چار دنوں میں سے ایک دن اس کے نام کردو۔ رواہ عبدالرزاق