45924 ابن جریج کی روایت ہے کہ مجھے ایک ایسے شخص نے خبر دی ہے میں جس کی تصدیق کرتا ہوں کہ حضرت عمر (رض) شہر میں چکر لگا رہے تھے اس دوران آپ نے ایک عورت کو کہتے ہوئے سنا۔ تطاول ھذا اللیل واسود جانبہ وارقنی ان لا حبیب الا عبہ۔ یہ رات طویل تر ہوگئی اور اس کے گوشے زیادہ تاریک ہونے لگے، نیز میں رات بھر بیدار رہی چونکہ میرے پاس میرا کوئی دوست نہیں تھا جس سے میں اپنا دل بہلاتی۔ فلولا حذار اللہ شیء مثلہ۔ لزعزع من ھذا السریر جوانیہ ۔ اگر اللہ تعالیٰ کا ڈر نہ ہوتا تو اس کی مانند کوئی چیز نہیں ہے پھر تو اس چارپائی کے کونے لگاتار حرکت میں ہوتے۔ حضرت عمر (رض) نے عورت سے پوچھا : تمہارا کیا معاملہ ہے ؟ اس نے جوب دیا کئی مہینوں سے میرا شوہر مجھ سے غائب ہے حالانکہ میں اس کی مشتاق ہوں فرمایا : کیا تم نے کسی برائی (زنا) کا ارادہ کیا ہے ؟ بولی : معاذ اللہ (اللہ کی پناہ) فرمایا : اپنے نفس کو قابو میں رکھو میں قاصد بھیج کر اسے منگواتا ہوں چنانچہ آپ (رض) نے عورت کے شوہر کی طرف قاصد بھیجا پھر آپ (رض) حضرت حفصہ (رض) کے پاس گئے اور ان سے فرمایا میں تم سے ایک بات پوچھتا ہوں جس نے مجھے غمزدہ کردیا ہے مجھے بتاؤ کہ کتنے عرصہ بعد عورت اپنے سو ہر کی مشتاق ہوجاتی ہے ؟ حضرت حفصہ (رض) نے اپنا سر جھکالیا اور حیاء محسوس کرنے لگیں۔ حضرت عمر (رض) نے فرمایا : بلاشبہ اللہ تعالیٰ حق گوئی سے نہیں شرماتا ۔ حضرت حفصہ (رض) نے اپنے ہاتھ سے تین مہینے کا اشارہ کیا اور پھر اشارہ کیا کہ زیادہ سے زیادہ چار مہینے۔ چنانچہ حضرت عمر (رض) نے اپنے امراء کو خط لکھا کہ سرحدوں پرچار مہینوں سے زیادہ لشکر نہ روکے جائیں ۔ رواہ عبدالرزاق