4623: ۔۔ حضرت علی (رض) سے مروی ہے کہ حضرت خدیجہ (رض) نے نبی اکرم (صلی اللہ علیہ وآلہ وسلم) سے اپنے دو بیٹوں کے بارے میں سوال کیا جو (پہلے کافر شوہر سے تھے) اور زمانہ جاہلیت میں مرگئے تھے۔ حضور (صلی اللہ علیہ وآلہ وسلم) نے فرمایا : وہ جہنم میں ہیں۔ پھر آپ (صلی اللہ علیہ وآلہ وسلم) نے حضرت خدیجہ (رض) کے چہرے میں غمزدگی کے آثار دیکھے تو فرمایا : اگر تم ان کا ٹھکانا دیکھ لو تو خود ہی ان سے نفرت کرنے لگوگی۔ پھر حضرت خدیجہ (رض) نے پوچھا : یا رسول اللہ میری وہ اولاد جو آپ سے ہوئی (اور انتقال کرچکی ہے) فرمایا : وہ جنت میں ہیں۔ پھر رسول اکرم (صلی اللہ علیہ وآلہ وسلم) نے ارشاد فرمایا :
مومنین اور ان کی اولاد جنت میں ہیں اور مشرکین اور ان کی اولاد جہنم میں ہیں۔ پھر آپ (صلی اللہ علیہ وآلہ وسلم) نے یہ آیت تلاوت فرمائی :
والذین آمنوا واتبعتہم ذریتہم بایمان الحقنا بہم ذریتہم۔
اور جو لوگ ایمان لائے اور ان کی اولاد بھی (راہ) ایمان میں ان کے پیچھے چلی۔ ہم ان کی اولاد کو بھی ان کے (درجے) تک پہنچا دیں گے اور ان کے اعمال میں سے کچھ کم نہ کریں گے۔ (مسند عبداللہ بن احمد بن حنبل، ابن ابی عاصم فی السنۃ)
کلام : امام ابن جوزی (رح) جامع المسانید میں فرماتے ہیں : اس کی سند میں محمد بن عثمان ایسا راوی ہے جس کی حدیث قبول نہیں کی جاسکتی اور بچوں کے عذاب کے بارے میں کوئی حدیث صحت کو نہیں پہنچتی۔