46326 نافع بن عمر حمحی، ابن ابی ملیکہ سے روایت نقل کرتے ہیں کہ جب نبی کریم (صلی اللہ علیہ وآلہ وسلم) اور ابوبکر (رض) غارثور کی طرف نکلے ابوبکر (رض) کبھی نبی کریم (صلی اللہ علیہ وآلہ وسلم) کے آگے چلتے اور کبھی آپ کے پیچھے چلتے نبی کریم (صلی اللہ علیہ وآلہ وسلم) نے ابوبکر (رض) سے اس کی وجہ پوچھی، ابوبکر (رض) نے جواب دیا جب میں آپ کے آگے چلتا ہوں اس وقت مجھے خدشہ لاحق ہوتا ہے کہ آپ کو کوئی پیچھے سے نہ آن لے اور جب آپ کے پیچھے چلتا ہوں مجھے خدشہ ہوتا ہے کہ کہیں آپ کو کوئی آگے سے نہ آن لے حلیٰ کہ جب غارثور تک پہنچے تو ابوبکر (رض) نے عرض کیا : آپ یہیں کھڑے رہیں میں اندر جاکر معائنہ کرلو تاکہ اگر کوئی سانپ بچھو ہو آپ سے قبل مجھے گزند پہنچائے نافع کہتے ہیں : غار میں ایک سوراخ تھا جس پر ابوبکر (رض) نے اپنا پاؤں رکھ دیا تھا کہ کوئی سانپ یا بچھو نبی کریم (صلی اللہ علیہ وآلہ وسلم) کو اذیت نہ پہنچاسکے۔ (رواہ البغوی وقال ابن کثیر ھذا مرسل حسن قال وقدرواہ وکیع ابن الجراح عن نافع عن ابن عمر المکی المکی عن رجل لم یسمہ کہ رسول اللہ (صلی اللہ علیہ وآلہ وسلم) اور ابوبکر (رض) جب غارثور میں پہنچے تو غار میں ایک سوراخ تھا ابوبکر (رض) نے سوراخ پر اپنا پاؤں رکھ دیا اور عرض کیا یارسول اللہ ! اگر بچھو یا سانپ ہو تو اس کا ڈس آپ کے علاوہ مجھے لگے) ۔