4634: ۔۔ یحییٰ بن ایوب الخزاعی سے مروی ہے کہ میں نے ایک شخص سے سنا کہ حضرت عمر بن خطاب (رض) کے زمانے میں ایک نوجوان عبادت گذار تھا جو زیادہ تر مسجد میں اپنا وقت گذارتا تھا۔ حضرت عمر (رض) بھی اس پر رشک کرتے تھے۔
اس نوجوان کا ایک بوڑھا باپ تھا۔ جوان جب بھی عشاء کی نماز پڑھ لیتا تو اپنے والد کے پاس چلا جاتا۔ اس کے راستے میں ایک عورت کا گھر پڑتا تھا جو اس پر فریفتہ ہوگئی تھی۔ وہ جب بھی گذرتا یہ راستے میں اس کو کھڑی ملتی۔ ایک مرتبہ نوجوان گذرا تو عورت اس کو مسلسل بہکانے لگی حتی کہ وہ عورت کے پیچھے پیچھے ہولیا۔ جب عورت کے گھر کے دروازے پر پہنچا تو عورت پہلے داخل ہوگئی جبکہ یہ داخل ہورہا تھا کہ اس کو اللہ یاد آگیا، گویا کہ سامنے سے پردہ چھٹ گیا اور یہ آیت اس کی زبان پر خود بخود جاری ہوگئی :
ان الذین اتقوا اذا مسہم طائف من الشیطان تذکروا فاذاھم مبصرون۔
اور نوجوان بےہوش ہو کر وہیں گرگیا۔ عورت نے اپنی باندی کو بلایا اور دونوں نے مل کر اسے اٹھایا اور نوجوان کے گھر کے دروازے پر لٹا آئیں۔ جبکہ اس کا والد انتظار میں تھا آخر وہ اس کی تلاش میں نکلا تو اس کو دروازے پر پڑا پایا۔ پھر اس نے اپنے گھر والوں میں سے کسی کو بلایا اور انھوں نے ان کو اٹھا کر اندر کیا۔ لیکن جوان کو ہوش نہ آیا حتی کہ رات کا کچھ حصہ بھی گذر گیا۔ آخر اس کے باپ نے اس کو جھنجھوڑا اور پوچھا اے بیٹے ! تجھے کیا ہوا ہے ؟ آخر بیٹا بولا : سب خیر ہے۔ باپ نے خدا کا واسطہ دے کر پوچھا تو بیٹے نے ساری بات سنا دی، باپ نے پوچھا : اے بیٹے وہ کونسی آیت ہے ؟ بیٹے نے پڑھی اور پھر بےہوش ہو کر گرگیا۔ باپ نے اور دوسرے گھر والوں نے اس کو ہلایا جلایا تو اس کی روح قفس عنصری سے پرواز کرچکی تھی۔ گھر والوں نے اس کو غسل دیا اور (نماز پڑھ کر) رات ہی کو دفن کردیا۔ جب صبح ہوئی تو حضرت عمر (رض) سے لوگوں نے اس بات کا ذکر کیا۔ حضرت عمر (رض) چل کر اس کے بوڑھے باپ کے پاس آئے اور اس کی تعزیت کی اور فرمایا : رات کو مجھے کیوں نہیں بتایا۔ باپ نے عرض کیا : امیر المومنین ! رات کا وقت تھا اس لیے آپ کو تکلیف دینا مناسب نہیں سمجھا حضرت عمر (رض) نے فرمایا : اچھا ہمیں اس کی قبر پر لے چلو۔ چنانچہ حضرت عمر (رض) اور دیگر لوگ آپ کے ساتھ جوان کی قبر پر آئے۔ اور حضرت عمر (رض) نے فرمایا : اے فلاں ! ولمن خاف مقام ربہ جنتان۔ (رحمن : 46) اور اس شخص کے لیے جو اپنے رب کے سامنے کھڑا ہونے سے ڈر گیا (دو جنتیں ہیں)
۔ یہ سن کر قبر کے اندر سے جوان نے آواز دی : اے عمر ! پروردگار نے مجھے دونوں جنتیں دو مرتبہ عطا فرما دی ہیں۔ (رواہ مستدرک الحاکم)