4657: ۔۔۔ (مسند عمر (رض)) ابی سنان (رح) سے مروی ہے کہ حضرت عمر بن خطاب (رض) نے ابو عبید (رض) کے بارے میں پوچھا تو آپ کو بتایا گیا کہ وہ موٹے کپڑے پہنتے ہیں اور سخت کھانا کھاتے ہیں (اور برے حالات کا شکار ہیں) آپ (رض) نے ایک ہزار دینار قاصد کے ہاتھ ان کے پاس بھیجے اور قاصد کو کہا : جب وہ یہ دینار لے لیں تو دیکھنا وہ ان کا کیا کرتے ہیں ؟ چنانچہ قاصد نے ان کو دینار دیے انھوں نے وہ لے کر اچھے کپڑے لے کر پہنے اور عمدہ کھانا خرید کر کھایا۔ قاصد نے آ کر ساری خبر سنائی۔ حضرت عمر (رض) نے فرمایا : اللہ ان پر رحم کرے انھوں نے اس آیت کی تفسیر کردی ہے :
لینفق ذو سعۃ من سعتہ و من قدر علیہ رزقہ فلینفق مما آتاہ اللہ۔ الطلاق :7
صاحب وسعت کو اپنی وسعت کے مطابق خرچ کرنا چاہیے اور جس کے رزق میں تنگی ہو وہ جتنا خدا نے اس کو دیا ہے اس کے موافق خرچ کرے۔ خدا کسی کو تکلیف نہیں دیتا مگر اسی کے مطابق جو اس کو دیا ہے۔ رواہ ابن جریر۔