4691: ۔۔ حضرت اسلم (رض) سے مروی ہے کہ حضرت عمر (رض) نے اذا الشمس کورت سورت کی تلاوت فرمائی۔ جب آپ اس آیت پر پہنچے : علمت نفس ما احضرت۔ تو فرمایا : اس کے لیے مساوی بات ذکر کی گئی ہے۔ (عبد بن حمید، ابن لمنذر، ابن ابی حاتم، ابن مردویہ، ابو داؤد الطیالسی)
فائدہ : ۔۔ سورة شمس میں اللہ تعالیٰ نے قیامت کے احوال میں سے ہول ناک امور کا بیان کیا کہ جب سورج لپیٹ لیا جائے گا، تارے بےنور ہوجائیں گے اور پہاڑ جلا دئیے جائیں گے۔ اس طرح اللہ پاک نے تیرہ آیات میں قیامت کی ہول ناکی کا احساس دلا کر چودھویں آیت میں سب سے اہم اور مقصود بالذکر شئی کو بیان کیا :
علمت نفس ما احضرت۔ تکویر : 14
(اس وقت) ہر نفس جان لے گا کہ وہ کیا لے کر آیا ہے۔