4706: ۔۔ حضرت علی (رض) سے مروی ہے ہم لوگ رسول اللہ (صلی اللہ علیہ وآلہ وسلم) کے پاس بیٹھے ہوئے تھے ۔ آپ نے ہمارے چہروں کی طرف نٖظر ڈالی اور پھر فرمایا : تم میں سے ہر شخص کا ٹھکانا معلوم ہے جنت میں اور دوزخ میں۔ پھر آپ (صلی اللہ علیہ وآلہ وسلم) نے یہ سورت تلاوت فرمائی :
واللیل اذا یغشی والنہار اذا تجلی وما خلق الذکر والانثی ان سعیکم لشتی ۔۔۔ سے۔۔ الیسری تک۔ (سورة اللیل : 1 ۔ 7)
رات کی قسم ! جب (دن کو) چھپالے۔ اور دن کی قسم جب چمک اٹھے۔ اور اس (ذات) کی قسم جس نے نر مادہ پیدا کیے کہ تم لوگوں کی کوشش طرح طرح (مختلف ) ہے۔ تو جس نے (خدا کے رستے میں مال ) دیا اور پرہیزگاری کی اور نیک بات کو سچ جانا اس کو ہم آسان طریقے کی توفیق دیں گے۔
پھر حضور (صلی اللہ علیہ وآلہ وسلم) نے ارشاد فرمایا یہ راستہ تو جنت کا ہے۔ پھر آپ نے آگے تلاوت فرمائی :
و اما من بخل واستغنی وکذب بالحسنی فسنیسرہ للعسری۔ اللیل : 8 ۔ 10 ۔
اور جس نے بخل کیا اور وہ بے پروا بنا رہا اور نیک بات کو جھوٹ سمجھا اسے سختی میں پہنچائیں گے۔