4713: ۔۔ ابن عباس (رض) سے مروی ہے کہ میں پتھروں میں بیٹھا ہوا تھا کہ ایک شخص میرے پاس آیا اور مجھ سے العادیات ضبحا کے متعلق سوال کیا۔ میں نے کہا : گھوڑے جب اللہ کی راہ میں غارت گری کرتے ہیں پھر رات کو اپنے ٹھکانے پر واپس آتے ہیں اور مجاہدین ان کو چارہ ڈالتے ہیں اور آگ جلاتے ہیں۔ (ان آیات کا یہی مطلب ہے) پھر وہ مجھ سے جدا ہو کر حضرت علی (رض) کے پاس گیا آپ (رض) زمزم کے پاس تشریف فرما تھے۔ اس شخص نے آپ (رض) سے بھی والعادیات ضبحا کے بارے میں سوال کیا۔ حضرت علی (رض) نے اسی سے پوچھا کیا تم نے مجھ سے قبل کسی سے اس کے بارے میں سوال کیا ہے ؟ اس شخص نے عرض کیا : جی ہاں۔ میں نے ابن عباس (رض) سے اس کے متعلق سوال کیا تھا۔ حضرت علی (رض) نے ارشاد فرمایا : اس سے مراد وہ گھوڑے ہیں جو خدا کی راہ میں غارت گیری کرتے ہیں۔ اور اب جاؤ ابن عباس (رض) کو میرے پاس بلا کر لاؤ۔ حضرت ابن عباس (رض) فرماتے ہیں جب میں جا کر آپ کے سر پر کھڑا ہوا تو آپ (رض) نے ارشاد فرمایا : اللہ کی قسم ! اسلام میں سب سے پہلا معرکہ بدر کا تھا اور اس معرکہ میں ہمارے پاس صرف دو گھوڑے تھے۔ ایک گھوڑا حضرت زبیر (رض) کا تھا اور ایک حضرت مقداد بن الاسود (رض) کا تھا۔ پس وہاں (صرف دو گھوڑوں کے لیے) والعادیات ضبحا کیسے ہوسکتا ہے ؟ (کیونکہ والعادیات جمع ہے جس میں دو سے زائد مراد ہیں لہٰذا العادیات ضبحا سے مراد عرفہ سے مزدلفہ جانے والی سواریاں مراد ہیں جہاں وہ آگ جلاتے ہیں (فالموریات قدحا اور طعام و شراب کا شغل کرتے ہیں) پھر اگلے دن المغیر صبحا مزدلفہ سے منی جانا مراد ہے۔ یی جمع ہے اور فاثرن بہ نقعا سے مراد سواریوں کا اپنے کھروں اور پیروں سے زمین روندنا ہے۔
ابن عباس (رض) فرماتے ہیں : یہ سن کر میں نے اپنے قول سے رجوع کرلیا اور حضرت علی کے ارشاد مبارک کا قائل ہوگیا۔ (رواہ ابن مردیہ)