4724: ۔۔۔ (مسند عمر (رض)) ابن عباس (رض) سے مروی ہے کہ حضرت عمر (رض) مجھے بدر کے اکابر صحابہ کے ساتھ شامل کرتے تھے۔ ایک مرتبہ حضرت عبدالرحمن بن عوف (رض) نے حضرت عمر (رض) نے حضرت عمر (رض) کو عرض کیا : آپ اس نوجوان کو ہمارے ساتھ داخل کیوں کرتے ہیں ؟ جبکہ اس کے جتنے تو ہمارے بیٹے ہیں۔ حضرت عمر (رض) نے ارشاد فرمایا : یہ ان لوگوں میں سے ہیں جن کو تم (اچھی طرح) جانتے ہو۔
ابن عباس (رض) فرماتے ہیں پھر ایک دن حضرت عمر (رض) نے مجھے اور ان کو بلایا اور میرا خیال تھا کہ آپ نے ہم کو صرف اس لیے بلایا ہے تاکہ میری اہمیت ان پر جتلائیں۔ چنانچہ حضرت عمر (رض) نے ان کے سامنے : اذا جاء نصر اللہ والفتح۔ پوری سورت تلاوت فرمائی پھر پوچھا : اس کی تفسیر کے بارے میں تم لوگوں کا کیا خیال ہے ؟ بعض نے کہا : (اس سورت میں) اللہ نے ہمیں حکم دیا ہے کہ ہم اس کی حمد کریں اور اس سے مغفرت مانگیں اس لیے کہ اس نے ہماری نصرت فرمائی ہے اور ہمیں فتح سے ہمکنار کیا ہے۔ بعض نے کہا : ہمیں کچھ نہیں معلوم اور بعض نے کوئی جواب نہیں دیا۔ آخرت حضرت عمر (رض) نے مجھے ارشاد فرمایا : اے ابن عباس ! کیا تمہارا بھی خیال یہی ہے ؟ میں نے عرض کیا : نہیں۔ آپ نے فرمایا : پھر تمہارا کیا خیال ہے ؟ میں نے عرض کیا : یہ رسول اللہ (صلی اللہ علیہ وآلہ وسلم) کے آخری وقت کی طرف اشارہ ہے۔ جو اللہ نے آپ کو بتادیا۔ یعنی جبکہ اللہ کی مدد آپ کو آچکی اور مکہ کی فتح بھی نصیب ہوگئی اور آپ دیکھ رہے ہیں کہ لوگ فوج در فوج اسلام میں داخل ہو رہے ہیں (تو لہٰذا آپ کی بعثت کا مقصود پورا ہوگیا) اسی لیے یہ آپ کی وفات کی طرف اشار ہے۔ پس آپ اپنے رب کی حمد بیان کریں اور اس سے استغفار کرتے رہیں بیشک وہ توبہ کرنے والا ہے۔
حضرت عمر (رض) نے مجھے فرمایا : مجھے بھی اس کی یہی تفسیر معلوم ہے جو تم کو معلوم ہے۔ (السنن لسعید بن منصور، ابن سعد مسند ابی یعلی، ابن جریر، ابن المنذر، الکبیر للطبرانی، ابن مردویہ، ابو نعیم والبیہقی معافی الدلائل)