4745: ۔۔ ابو ادریس خولانی (رح) سے مروی ہے کہ حضرت ابی (رض) سورة فتح کی یہ آیات یوں پڑھتے تھے :
اذ جعل الذین کفروا قلوبھم الحمیۃ حمیۃ الجاھلیۃ ولو حمیتم کما حمو نفسہ لفسد المسجد الحرام فانزل اللہ سکینتہ علی رسولہ۔
(جبکہ آیت ولو حمیتم کما حموا نفسہ المسجد الحرام منسوخ التلاوت ہوچکی ہے جس کا معنی ہے : اور اگر تم (بھی) کافروں کی طرح جاہلیت کی) حمایت کرتے جیسے انھوں نے اپنی کی تو مسجد حرام خراب ہوجاتی جب یہ بات حضرت عمر (رض) کو پہنچی تو حضرت عمر (رض) کو حضرت ابی (رض) پر سخت غصہ آیا۔ چنانچہ کسی کو بھیج کر حضرت ابی (رض) کو بلوایا۔ وہ تشریف لے آئے۔ پھر حضرت عمر (رض) نے دیگر چند اصحاب رسول اللہ (صلی اللہ علیہ وآلہ وسلم) کو بھی بلایا جن میں زید بن ثابت بھی تھے۔ پھر حضرت عمر (رض) نے فرمایا : تم میں سے کون ہے جو سورة الفتح پڑھ کر سنائے گا ؟ لہٰذا حضرت زید (رض) نے آج کی قراءت کے مطابق سورة الفتح کی تلاوت کی۔ لہٰذا (حضرت ابی (رض) کی آیت کو اس میں بھی نہ پا کر) ان پر مزید غصہ ہوئے۔ حضرت ابی (رض) نے عرض کیا : میں کچھ کہنا چاہتا ہوں۔ حضرت عمر (رض) نے فرمایا : یوں بولو : حضرت ابی (رض) نے عرض کیا : آپ جانتے ہیں کہ میں نبی کریم (صلی اللہ علیہ وآلہ وسلم) کے پاس حاضر ہوتا رہتا تھا۔ آپ (صلی اللہ علیہ وآلہ وسلم) بھی مجھے اپنے قریب رکھتے تھے جبکہ آپ تو دروازے پر ٹھہرے رہتے تھے۔ لہٰذا اگر آپ چاہتے ہیں کہ میں لوگوں کو اسی طرح پڑھاؤں جس طرح نبی کریم (صلی اللہ علیہ وآلہ وسلم) نے مجھے پڑھایا ہے تو ٹھیک ہے میں پڑھاؤں گا۔ ورنہ میں تا زندگی ایک حرف بھی کسی کو نہیں پڑھاؤں گا۔ (نسائی، ابن ابی داؤد فی المصاحف، مستدرک الحاکم)
فائدہ : ۔۔۔ حضرت ابی (رض) کو غالباً ان آیات کے منسوخ ہونے کا علم نہ تھا اسی وجہ سے حضرت ابی (رض) نے ان آیات کو بھی قرآن کے ساتھ پڑھتے تھے۔ کیونکہ آخری دور میں حضور (صلی اللہ علیہ وآلہ وسلم) نے من جانب اللہ کچھ آیات کو منسوخ فرمایا اور دیگر احکام میں ردو بدل فرمایا جیسا کہ روای تنمبر 4725 میں گذر چکا۔ لہٰذا صحابہ کرام (رض) نے خلفاء راشدہ کے زمانہ میں قرآن جمع کیا اور شہادتوں کے ساتھ کیا۔ جس آیت پر کم از کم دو صحابہ شہادت دیتے تھے اسی کو قرآن کا حصہ بنا کر لکھا جاتا تھا۔ اس کوشش سے و قرآن جس کو پڑھا جانے کا حکم تھا وجود میں آیا اور قرآن کے منسوخ التلاوت حصص نکال دیے گئے، جیسا کہ سورة الاحزاب کے متعلق روایت نمبر 4743 میں حضرت ابی (رض) ہی کا ارشاد گذر چکا ہے۔
لہذا حضرت ابی (رض) بعد میں جن آیات کے قرآن ہونے پر مصر رہے جبکہ دیگر صحابہ کرام ان کے منسوخ ہونے کے قائل تھے تو زیادہ قریب قیاس توجیہ ہی ہے کہ حضرت ابی (رض) کو بعد کے نسخ کا علم نہ ہوسکا۔ واللہ اعلم بالصواب۔ (رض) اجمعین۔