4751: ۔۔۔ (مسند صدیق (رض)) زید بن ثابت (رض) سے مروی ہے کہ مجھے حضرت ابوبکر (رض) اہل یمامہ کے قتال کے بعد بلایا۔ میں پہنچا تو آپ کے پاس حضرت عمر (رض) بھی حاضر تھے۔ حضرت ابوبکر (رض) نے (حضرت عمر (رض) کی طرف اشارہ کرکے) فرمایا : یہ میرے پاس آئے اور مجھ سے قتل (ہوجانے والے صحابہ) کے متعلق بات چیت کی کہ یمامہ کی جنگ میں بہت سے قرآن کے قاری شہید ہوگئے ہیں۔ نیز یہ کہ مجھے خوف ہے کہ کہیں دوسری جنگوں میں قرآن کے تمام قاری شہید نہ ہوجائیں۔ اور یوں قرآن ضائع ہوجائے لہٰذا میرا خیال ہے کہ ہم قرآن کو جمع کرلیں۔
حضرت ابوبکر (رض) حضرت عمر (رض) کی بات بتا چکے تو حضرت زید بن ثابت (رض) نے حضرت عمر (رض) کو مخاطب کرکے پوچھا : ہم وہ کام کیسے کریں جو رسول اللہ (صلی اللہ علیہ وآلہ وسلم) نے نہیں کیا : حضرت عمر (رض) نے فرمایا : اللہ کی قسم ! اسی میں خیر ہے۔ حضرت عمر (رض) نے فرمایا : اللہ کی قسم ! اسی میں خیر ہے۔ حضرت زید (رض) فرماتے ہیں : حضرت عمر (رض) مسلسل مجھ پر اصرار کرتے رہے حتی کہ اللہ نے میرا سینہ بھی اس کام کے لیے کھول دیا جس کام کے لیے حضرت عمر (رض) وک شرح سدر ہوچکا تھا۔ اور جو رائے حضرت عمر (رض) کی تھی وہی رائے اس کام میں میری بھی پختہ ہوگئی۔ حضرت زید (رض) فرماتے ہیں حضرت عمر (رض) حضرت ابوبکر (رض) کے پاس بیٹھے اور حضرت ابوبکر (رض) کچھ بات چیت نہ فرما رہے تھے پھر انھوں نے ہی مجھے ارشاد فرمایا : تم عقل مند نوجوان ہو ہم کو تم پر کسی طرح کی تہمت (اور الزام بھی) نہیں ہے اور تم رسول اللہ (صلی اللہ علیہ وآلہ وسلم) کے لیے وحی بھی لکھتے رہے ہو۔ لہٰذا تم ہی اس کو جمع کرو۔ حضرت زید (رض) فرماتے ہیں : اللہ کی قسم ! اگر یہ مجھے پہاڑوں میں سے کسی پہاڑ کے منتقل کرنے کا حکم دیتے تو وہ مجھ پر قرآن جمع کرنے سے بھاری نہ ہوتا۔ پھر میں نے عرض کیا : آپ لوگ ایسا کام کیسے کر رہے ہیں جو حضور (صلی اللہ علیہ وآلہ وسلم) نے نہیں کیا۔ حضرت ابوبکر (رض) نے مجھے فرمایا : اللہ کی قسم ! اسی میں خیر ہے۔ پھر حضرت ابوبکر (رض) بھی مسلسل اصرار فرماتے رہے حتی کہ اللہ پاک نے میرا سینہ بھی اس کام کے لیے کھول دیاجس کے لیے حضرت ابوبکر (رض) اور حضرت عمر (رض) کو شرح صدر فرما دیا تھا اور میں نے بھی یہی رائے قائم کرلی۔ چنانچہ میں نے مختلف چیزوں کے ٹکڑوں، پتھروں، ہڈیوں جن پر قرآن لکھا تھا اور لوگوں کے سینوں سے قرآن پاک جمع کرنا شروع کیا۔ حتی کہ میں نے سورة برأت کا آخری حصہ خزیمہ بن ثابت انصاری (رض) کے پاس پایا۔ ان کے علاوہ کسی کے پاس میں نے یہ آیات نہیں پائیں۔
لقد جاء کم رسول من انفسکم عزیز علیہ ۔۔۔ سے آخر سورة تک۔
آخر جن صحیفوں میں قرآن پاک جمع کرلیا گیا وہ صحیفے (پلندے) حضرت ابوبکر (رض) کی زندگی تک انہی کے پاس رہے۔ حتی کہ اللہ پاک نے ان کو وفات دیدی پھر حضرت عمر (رض) کے پاس ان کی وفات تک یہ صحیفے رہے، پھر ان کی وفات بھی ہوگئی۔ پھر یہ صحیفے حضرت حفصہ بنت حضرت عمر (رض) کے پاس رہے۔ (ابو داؤد الطیالسی، ابن سعد، مسند احمد، بخاری، العدنی، ترمذی، نسائی، ابن جریر، ابن ابی داؤد فی المصاحف، ابن المنذر، ابن حبان، الکبیر للطبرانی، السنن للبیہقی)