4755: ۔۔ ابن شہاب روایت کرتے ہیں سالم بن عبداللہ اور خارجہ رحمہما اللہ سے کہ :
حضرت ابوبکر (رض) نے قرآن کو کاغذوں میں جمع کیا اور حضرت زید بن ثابت (رض) کو اس کے دیکھنے کا حکم دیا۔ انھوں نے پہلے تو انکار کیا لیکن پھر حضرت عمر (رض) کی مدد کے ساتھ اس کام کو کرنے پر آمادہ ہوگئے۔ (قرآن جمع ہونے کے بعد اس کے) اوراق حضرت ابوبکر (رض) کے پاس رہے۔ پھر ان کی وفات ہوگئی۔ آپ کے بعد وہ اوراق حضرت عمر (رض) کے پاس رہے، حضرت عمر (رض) کی وفات کے بعد وہ اوراق حضور (صلی اللہ علیہ وآلہ وسلم) کی بیوی حضرت حفصہ (رض) کے پاس چلے گئے۔ حضرت عثمان (رض) نے آپ (رض) سے منگوائے تو آپ نے دینے سے انکار کردیا۔ حضرت عثمان (رض) نے ان کو وعدہ دیا کہ یہ اوراق ان کو واپس کردیے جائیں گے۔ تب حضرت حفصہ (رض) نے وہ اوراق حضرت عثمان (رض) کو بھیج دیے۔ آپ (رض) نے ان کو دیکھ کر قرآن پاک کے دوسرے نسخے تیار کرائے پھر اصل اوراق حضرت حفصہ کو واپس کردیے۔ اور یہ اوراق حضرت حفصہ (رض) کے پاس ہی رہے۔
امام زہری فرماتے ہیں : مجھے سالم بن عبداللہ نے خبر دی کہ (خلیفہ) مروان نے بارہا حضرت حفصہ (رض) کے پاس اوراق کے لیے پیغام بھجوائے جن میں قرآن لکھا ہوا تھا۔ لیکن حضرت حفصہ (رض) مسلسل انکار کرتی رہیں۔ جب حضرت حفصہ (رض) کی تدفین سے فارغ ہوئے تو مروان نے بہت تاکید اور سختی کے ساتھ حضرت عبداللہ بن عمر (رض) کے پاس پیغام بھیج کر وہ اوراق منگوائے۔ لہٰذا حضرت عبداللہ نے وہ اوراق خلیفہ مروان کو بھیج دیے۔ پھر مروان کے حکم سے ان کو پھاڑ کر شہید کردیا گیا۔ اور اس کی وجہ بیان کی کہ ان کے اوراق میں جو کچھ قرآن تھا وہ دوسرے نسخوں میں لکھ دیا گیا ہے اور اس کو حفظ بھی کرلیا گیا ہے۔ مجھے خوف ہے کہ طویل زمانہ گذرنے کے بعد لوگ شک میں مبتلا ہوں گے اور کہیں گے شاید ان نسخوں میں کوئی چیز لکھنے سے رہ گئی ہے۔ رواہ ابن ابی داود۔