4759: ۔۔ یحییٰ بن عبدالرحمن بن حاطب سے مروی ہے وہ فرماتے ہیں : حضرت عمر بن خطاب (رض) نے قرآن جمع کرنے کا ارادہ کیا۔ لہٰذا آپ لوگوں کے بیچ خطبہ ارشاد فرمانے کے لیے کھڑے ہوئے اور فرمایا : جس شخص نے رسول اللہ (صلی اللہ علیہ وآلہ وسلم) سے قرآن کا کچھ حصہ حاصل کیا ہو وہ اس کو لے کر ہمارے پاس آجائے۔
لوگوں نے قرآن پاک کاغذوں، تختیوں اور ہڈیوں وغیرہ پر لکھا ہوا تھا۔ اس کے باوجود حضرت عمر (رض) نے کسی سے کوئی آیت یا سورت وغیرہ اس وقت تک قبول نہ فرماتے تھے۔ جب تک وہ اس پر دو گواہ پیش نہ کردے۔ لیکن ہنوز یہ کام تکمیل کو نہ پہنچا تھا کہ آپ (رض) کی شہادت ہوگئی۔ پھر حضرت عثمان (رض) (اپنی خلافت میں) کھڑے ہوئے اور ارشاد فرمایا : جس کے پاس کتاب اللہ کی کوئی چیز ہو وہ اسے لے کر ہمارے پاس آجائے۔ حضرت عثمان (رض) بھی کسی سے کوئی چیز قبول نہ فرماتے تھے تاوقتیکہ وہ اس پر دو گواہ پیش کردے۔ آخر میں حضرت خزیمہ بن ثابت (رض) آئے اور حضرت عثمان (رض) کو عرض کیا : میں دیکھتا ہوں کہ آپ لوگوں نے دو آیتیں لکھنے سے چھوڑ دی ہیں۔ (حضرت عثمان (رض) اور ان کے لکھنے والے رفقاء نے) کہا : وہ کونسی دو آیتیں ہیں ؟ خزیمہ نے عرض کیا :
لقد جاء کم رسول من انفسکم الی آخر السورۃ۔ براءت۔
حضرت عثمان (رض) نے فرمایا : میں شہادت دیتا ہوں کہ وہ اللہ کی طرف سے نازل شدہ ہیں تمہارا کیا خیال ہے قرآن کے کے کس حصے میں ان کو رکھیں (جہاں حضور (صلی اللہ علیہ وآلہ وسلم) ان کو رکھتے ہوں) خزیمہ (رض) نے عرض کیا : آپ کسی بھی سورت کے آخر میں ان کو رکھ دیں۔ چنانچہ سورة برأت کے آخر میں ان دو آیت کو رکھ دیا۔ ابن ابی داؤد ، ابن عساکر۔