4762: ۔۔ سلیمان بن ارقم روایت کرتے ہیں حسن، ابن سیرین اور ابن شہاب (الزہری) سے اور زہری ان میں سب سے زیادہ حدیث جاننے والے تھے۔ یہ حضرات فرماتے ہیں :
جنگ یمامہ میں چار سو قراء شہید ہوئے
جنگ یمامہ میں جب قراء قرآن قتل ہوگئے جو لگ بھگ چار سو افراد تھے تو حضرت زید بن ثابت (رض) حضرت عمر (رض) سے ملے اور ان کو عرض کیا : یہ قرآن ہمارے دین کو جمع کرنے والا ہے، اگر یہ قرآن ہی ضائع ہوگیا تو ہمارا دین ہی ضائع ہوجائے گا۔ لہٰذا میں نے پختہ ارادہ کیا ہے کہ پورا قرآن ایک کتاب میں جمع کردوں۔ حضرت عمر (رض) نے فرمایا : اچھا انتظار کرو میں ابوبکر (رض) سے پوچھتا ہوں۔ چنانچہ دونوں حضرات حضرت ابوبکر (رض) کی خدمت میں پہنچے اور ان کو اس خیال سے اگاہ کیا۔ حضرت ابوبکر (رض) نے فرمایا : تم دونوں عجلت نہ کرو۔ حتی کہ میں مسلمانوں سے مشورہ کرلوں۔
پھر حضرت ابوبکر (رض) لوگوں کو خطبہ ارشاد فرمانے کے واسطے کھڑے ہوئے اور ان کو اس بات کی اہمیت روشناس کرائی۔ لوگوں نے کہا : آپ نے ٹھیک سوچا ہے۔ چنانچہ جمع قرآن کا کام شروع ہوا۔ اور حضرت ابوبکر (رض) نے اعلان کردیا کہ جس کے پاس قرآن کا کوئی حصہ ہو وہ لے آئے۔ حضور (صلی اللہ علیہ وآلہ وسلم) کی بیوی حضرت حفصہ بنت عمر (رض) فرمانے لگیں : جب تم اس آیت : حافظوا علی الصلوات والصلوۃ الوسطی تک پہنچوں تو مجھے خبر دیدینا۔ جب وہ لکھتے لکھتے اس مقام پر پہنچے تو (انہوں نے حفصہ (رض) کو خبر دی) حضرت حفصہ نے فرمایا : لکھو : والصلاۃ الوسطی وھی صلوۃ العصر۔ یعنی درمیانی نماز سے مراد عصر کی نماز ہے۔ اس پر حضرت عمر (رض) نے اپنی بیٹی حفصہ کو فرمایا : کیا تمہارے پاس اس کی کوئی دلیل ہے ؟ حفصہ نے عرض کیا : نہیں۔ تب حضرت عمر (رض) نے ارشاد فرمایا :
اللہ کی قسم ایسی کوئی چیز قرآن میں داخل نہیں کی جائے گی، جس پر ایک عورت شہادت دے اور وہ بھی بغیر دلیل کے۔
اسی طرح حضرت عبداللہ بن مسعود (رض) نے فرمایا : لکھو :
والعصر ان الانسان لفی خسر وانہ فیہ الی آخر الدھر۔
قسم زمانہ کی انسان خسارے میں ہیں۔ العصر۔
اور وہ اس آخر زمانہ تک مبتلا ہے۔
حضرت عمر (رض) نے فرمایا : اس عربی دیہاتیت کو ہم سے دور رکھو۔ ابن الانباری فی المصاحف۔
فائدہ : ۔۔ یہ حضرات تفسیر نکات کو قرآن پاک میں لکھوانا چاہتے تھے، جس پر حضرت عمر (رض) نے سختی سے تردید فرمائی۔ (رض) اجمعین۔