4765: ۔۔ محمد بن کعب قرظی (رح) سے مروی ہے کہ حضور اکرم (صلی اللہ علیہ وآلہ وسلم) کے دور میں پانچ انصاری صحابہ نے قرآن جمع کیا : معاذ بن جبل، عبادۃ بن صامت، ابی بن کعب، ابو ایوب اور ابو الدرداء (رض) اجمعین۔ جب حضرت عمر بن خطاب (رض) کا دور مبارک آیا تو یزید بن ابی سفیان نے حضرت عمر (رض) کو لکھا :
اہل شام بہت زیادہ ہوگئے ہیں، ان کی آل اولاد بھی کثیر ہوگئی ہے اور یہ لوگ تمام شہروں میں بھر گئے ہیں اور ان کو ایسے لوگوں کی اشد ضرورتے جو ان کو قرآن کی تعلیم دیں۔ لہٰذا اے امیر المومنین ایسے لوگوں کے ساتھ ان کی مدد فرمائیں جو ان کو قرآن وغیرہ کی تعلیم دیں۔
چنانچہ حضرت عمر (رض) نے ان مذکورہ پانچ افراد کو بلایا۔ اور فرمایا : تمہارے شامی بھائیوں نے مجھ سے مدد مانگی ہے کہ میں ان کو قرآن سکھانے کے اور دین کی تعلیم دینے کے لیے کچھ افراد مہیا کروں۔
لہذا اللہ تم پر رحم کرے تم میں سے تین افراد اس کام میں میری مدد کریں۔ اگر تم چاہو تو قرعہ اندازی کرلو اور اگر چاہو تو خوشی سے تین افراد نکل پڑو۔ ان حضرات نے جواب دیا : ہم قرعہ اندازی نہیں کرتے۔ یہ ایوب (رض) تو بوڑھے ہوگئے ہیں اور یہ ابی بن کعب (رض) بیمار ہیں لہٰذا معاذ بن جبل، عبادۃ بن صامت اور ابو الدرداء (رض) نکلنے پر آمادہ ہوگئے۔
حضرت عمر (رض) نے ارشاد فرمایا : حمص کے شہر سے ابتداء کرو۔ تم لوگوں کو مختلف طبیعتوں پر پاؤگے کچھ لوگ تو جلد تعلیم سمجھنے والے ہوں گے، پس جب تم دیکھو کہ لوگ آسانی سے تعلیم حاصل کر رہے ہیں تو ایک شخص ان کے پاس ٹھہر جائے اور ایک دمشق نکل جائے اور دوسرا فلسطین نکل جائے۔
چنانچہ یہ تین حضرات حمص تشریف لائے۔ اور اتنا عرصہ وہاں رہے کہ ان لوگوں کی تعلیم پر اطمینان ہوگیا پھر حضرت عبادہ (رض) تو وہیں ٹھہر گئے اور ابو الدرداء (رض) دمشق کی طرف نکل گئے۔ اور حضرت معاذ (رض) فلسطین کوچ کرگئے۔ بعد میں حضرت معاذ (رض) وہیں عمواس کے طاعون میں وفات پا گئے۔ عبادہ (رض) (جو حمص میں تھے حضرت معاذ کی وفات کے بعد) فلسطین گئے اور وہیں وفات پائی اور حضرت ابو الدرداء (رض) دمشق ہی رہے اور وہیں وفات پائی۔ ابن سعد، مستدرک الحاکم۔