4770: ۔۔۔ (مسند عثمان (رض) ابن عباس (رض) سے مروی ہے فرماتے ہیں : میں نے حضرت عثمان بن عفان (رض) سے عرض کیا : تم نے سورة انفال جو سو سے کم آیات والی ہے اور سورة توبہ جو سو سے اوپر والی ہے دونوں کو باہم ملا دیا ؟ اور دونوں کے درمیان بسم اللہ الرحمن الرحیم نہیں لکھی ؟ اور یوں ان دونوں کو السبع الطوال (سات بڑی سورتوں) میں سے ایک کردیا۔ اس کی کیا وجہ ہے ؟ حضرت عثمان (رض) نے ارشاد فرمایا :
حضور (صلی اللہ علیہ وآلہ وسلم) پر مختلف تعداد کی آیات پر مشتمل سورتیں نازل ہوتی رہتی تھیں جب آپ پر کوئی بھی آیت نازل ہوئی ہوتی تھی آپ کسی کاتب کو بلاتے اور فرماتے اس کو فلاں سورت میں جس میں ان ان چیزوں کا بیان ہے رکھ دو ۔ اسی طرح زیادہ آیات نازل ہوتی تب بھی کسی کو بلاتے اور فرماتے ان کو فلاں فلاں مضمون والی سورت میں رکھ دو ۔ سورة انفال مدینہ میں نازل ہونے والی سورتوں میں سب سے پہلی سورت تھی۔ اور سورة برأت قرآن میں آخر میں نازل ہونے والی سورتوں میں سے تھی۔
سورة برأت کے مضامین بھی سورة انفال کے مشابہ تھے۔ لہٰذا میں سمجھا کہ برأت بھی انفال کا حصہ ہے۔ اسی دوران رسول اللہ (صلی اللہ علیہ وآلہ وسلم) کی وفات ہوگئی اور آپ نے اس کی وضاحت نہیں فرمائی کہ اس کا تعلق انفال سے ہے۔ اس وجہ سے میں نے دونوں کو ملا دیا اور دونوں کے درمیان بسم اللہ الرحمن الرحیم بھی نہیں لکھی۔ اور ان دونوں کو (ایک کرکے ) سات بڑی سورتوں میں شامل کردیا۔ (ابو عبید فی فضائلہ، ابن ابی شیبہ، مسند احمد، ابو داود، ترمذی، نسائی، ابن المنذر، ابن ابی داود، ابن الانباری، معافی المصاحف، انحاس فی ناسخہ، صحیح ابن حبان، ابو نعیم فی المعرفۃ ، ابن مردویہ، مستدرک الحاکم، السنن للبیہقی، السنن لسعید بن منصور)