4775: ۔۔۔ زری (رح) سے مروی ہے وہ انس بن مالک سے روایت کرتے ہیں کہ حضرت حذیفہ بن الیمان جو آرمینیہ اور آذر بائیجان کے محاذوں پر اہل عراق کے ساتھ مل کر اہل شام سے لڑ رہے تھے۔ حضرت عثمان بن عفان (رض) کی خدمت میں حاضر ہوئے۔ حضرت حذیفہ (رض) نے مجاہدین کو قرآن میں اختلاف کرتے دیکھا تھا۔ لہٰذا حضرت عثمان (رض) کی خدمت میں حاضر ہوئے۔ حضرت حذیفہ (رض) نے مجاہدین کو قرآن میں اختلاف کرتے دیکھا تھا۔ لہٰذا حضرت عثمان (رض) کو عرض کیا : یا امیر المومنین ! اس امت کو بچا لیں قبل اس سے کہ وہ کتاب اللہ میں اختلاف اور انتشار کا شکار ہوجائیں جیسا کہ یہود و نصاری ہوئے۔ چنانچہ حضرت عثمان (رض) نے حضرت حفصہ (رض) کو پیغام بھیجا کہ تمہارے پاس جو مصحف شریف ہے بھیج دو ہم اس کی نقل کرکے اور مصاحف تیار کریں گے اور پھر آپ کو اصل واپس کردیں گے۔ حضرت حفصہ (رض) نے حضرت عثمان (رض) کو وہ اوراق بھیج دیے جن میں قرآن لکھا ہوا تھا۔ حضرت عثمان (رض) نے حضرت زید بن ثابت، حضرت سعید بن العاص، حضرت عبدالرحمن بن حارث بن ہشام اور عبداللہ بن زبیر (رض) کو پیغام بھیج کر بلوایا۔ اور حکم دیا کہ ان صحیفوں (اوراق) سے نقل کر کر کے دوسرے مصاحف میں لکھیں۔ اور (حضرت زید کے علاوہ) تین قریشی صحابیوں کو فرمایا : جب تمہارا اور زید کا کسی چیز میں اختلاف ہوجائے تو تم قریشی زبان میں لکھنا۔ کیونکہ قرآن قریش کی زبان میں نازل ہوا ہے۔ آخر میں کئی مصاحف تیار کرلیے گئے تو حضرت عثمان (رض) نے ہر طرف ایک مصحف شریف بھیج دیا اور یہ بھی حکم دیا کہ اس کے علاوہ جو صحیفے یا مکمل مصحف شریف جہاں ہو وہ جلا دیے جائیں۔
امام زہری (رح) کہتے ہیں مجھے خارجہ بن زید نے فرمایا کہ حضرت زید بن ثابت (رض) نے فرمایا : میں نے ایک آیت سورة احزاب کی مفقود پائی جو رسول اللہ (صلی اللہ علیہ وآلہ وسلم) کو پڑھتے ہوئے سنا کرتا تھا :
من المومنین رجال صدقوا ما عاھدوا اللہ علیہ فمنہم من قضی نحبہ و منہم من ینتظر ۔ الاحزاب۔
لہذا میں نے اس کو تلاش کیا اور خزیمہ بن ثابت یا (ان کے بیٹے) ابن خزیمہ کے پاس اس آیت کو پایا اور پھر اس کو اس کی جگہ سورت میں ملا دیا۔
امام زہری (رح) فرماتے ہیں : اسی وقت ان حضرات کا لفظ التابوت میں اختلاف ہوا (جس کا ذکر سورة بقرہ 248 میں ہے) قریشی اصحاب نے التابوت کہا جبکہ حضرت زید (رض) نے التابوہ کہا۔ یہ اختلاف حضرت عثمان کی خدمت میں ذکر کیا گیا۔ حضرت عثمان نے فرمایا : تم التابوت لکھو کیونکہ یہ قریش کی زبان میں نازل ہوا ہے۔ (ابن سعد، بخاری، ترمذی، نسائی، ابن ابی داود، ابن الانباری فی المصاحف معا، الصحیح لابن حبان، السنن للبیہقی)