4777: ۔ سوید بن غفلہ (رح) سے مروی ہے کہ میں نے حضرت علی بن ابی طالب (رض) کو فرماتے ہوئے سنا :
کام میں اے لوگو ! عثمان کے بارے میں غلو کا شکار مت ہوجاؤ۔ اور ان کے مصاحف کے متعلق خیر کے سوا کچھ نہ کہو۔ اللہ کی قسم ! مصاحف قرآن میں انھوں نے جو کچھ بھی کیا وہ ہماری سب کی رضامندی سے کیا۔ حضرت عثمان (رض) نے پوچھا تھا : تم اس قراءت کے بارے میں کیا کہتے ہو۔ مجھے یہ بات پہنچی ہے کہ لوگ ایک دوسرے کو کہہ رہے ہیں میری قراءت تمہاری قراءت سے بہتر ہے اور یہ بات کفر کے قریب پہنچا دیتی ہے۔ حضرت علی (رض) فرماتے ہیں : ہم نے کہا آپ ہی بتائیے (امیر المومنین عثمان بن عفان) آپ کا کیا خیال ہے ؟ حضرت عثمان (رض) نے فرمایا : ہمارا خیال ہے کہ تمام لوگوں کو ایک مصحف پر جمع کردیا جائے جس میں کوئی فرق ہو اور نہ اختلاف۔ ہم نے کہا : جو آپ نے فرمایا بالکل ٹھیک ہے۔ تب حضرت عثمان (رض) نے پوچھا : تم میں سب سے زیادہ فصیح کون ہے ؟ اور سب سے زیادہ اچھا قاری کون ہے ؟ کہا : اچھی زبان والے سعید بن العاص ہیں اور سب سے زیادہ قاری زید بن ثابت ہیں۔ چنانچہ عثمان بن عفان (رض) نے فرمایا : ان میں سے ایک لکھواتا جائے دوسرا لکھتا جائے۔ چنانچہ دونوں حضرات نے حکم کی تعمیل کی اور یوں حضرت عثمان (رض) نے تمام لوگوں کو ایک مصحف پر جمع کردیا۔
پھر حضرت علی (رض) نے فرمایا : اللہ کی قسم ! اگر میں اس وقت والی ہوتا تو میں بھی بالکل یہی کرتا جو عثمان (رض) نے کیا۔ (ابن ابی داود، وابن الانباری فی المصاحف، مستدرک الحاکم، السنن للبیہقی)