4779: ۔۔ مصعب بن سعد سے مروی ہے کہ حضرت عثمان (رض) لوگوں کو خطبہ دینے کے لیے کھڑے ہوئے اور فرمایا : اے لوگو ! تم کو نبی (صلی اللہ علیہ وآلہ وسلم) کا زمانہ بیتے ہوئے تیرہ سال کا عرصہ بیت چکا ہے۔ اور تم قرآن میں شک میں مبتلا ہو۔ کہتے ہو یہ ابی (رض) کی قراءت ہے۔ کبھی کہتے ہو یہ عبداللہ کی قراءت ہے۔ کوئی کہتا ہے واللہ ہم تمہاری قراءت کو تسلیم نہیں کرتے۔ لہٰذا میں تم کو انتہائی تاکید کے ساتھ حکم کرتا ہوں کہ جس شخص کے پاس کچھ بھی قرآن ہو وہ اس کو لے کر آئے۔ پس کوئی ورقہ پر لکھا ہوا قرآن لے کر آتا اور کوئی چمڑے پر لکھا ہوا قرآن پاک لے کر آتا۔ حتی کہ اس طرح قرآن کا اکثر حصہ جمع کرلیا گیا۔ پھر حضرت عثمان (رض) اس جگہ تشریف لائے (جہاں قرآن پاک لکھا جا رہا تھا) آپ (رض) نے سب لوگوں کو ایک ایک کرکے بلایا اور ہر ایک کو واسطہ دے دے کر پوچھا : کیا تو نے رسول اللہ (صلی اللہ علیہ وآلہ وسلم) کو سنا ہے اور وہ تجھے املاء کروا رہے تھے یہ قرآن کا حصہ ہے ؟ وہ کہتا : جی ہاں۔ پس جب حضرت عثمان (رض) اس جگہ تشریف لائے (جہاں قرآن پاک لکھا جا رہا تھا) آپ (رض) نے سب لوگوں کو ایک ایک کرکے بلایا اور ہر ایک کو واسطے دے کر پوچھا : کیا تو نے رسول اللہ (صلی اللہ علیہ وآلہ وسلم) کو سنا ہے اور وہ تجھے املاء کروا رہے تھے۔ یہ قرآن کا حصہ ہے ؟ وہ کہتا : جی ہاں۔ پس جب حضرت عثمان (رض) اس کام سے فارغ ہوگئے تو پوچھا : لوگوں میں سب سے بڑا کاتب کون ہے ؟ لوگوں نے حضرت زید بن ثابت رسول اللہ (صلی اللہ علیہ وآلہ وسلم) کا نام لیا۔ پھر آپ (رض) نے پوچھا : لوگوں میں سب سے زیادہ فصیح اللسان کون ہے ؟ لوگوں نے حضرت سعید بن العاص (رض) کا نام لیا۔ لہٰذا حضرت عثمان (رض) نے حکم جاری فرمایا کہ سعید املاء کروائیں اور زید کتابت کرتے رہیں۔ پس زید (رض) نے قرآن پاک کی کتابت فرمائی اور اس (ایک مصحف) کے ساتھ کئی مصاحف لکھے۔ پھر حضرت عثمان (رض) نے ان کو لوگوں میں پھیلا دیا۔
مصعب بن سعد کہتے ہیں میں نے بعض صحابہ کرام (رض) کو فرماتے ہوئے سنا کہ انھوں نے یہ کام (بہت) اچھا کیا۔