4782: ۔۔ محمد بن سیرین (رح) سے مروی ہے فرمایا : کوئی آدمی قرآن پڑھتا تھا تو دوسرا اس کو کہتا تھا میں تو اس کا انکار کرتا ہوں جس طرح تم پڑھتے ہو۔ یہ بات حضرت عثمان (رض) کو ذکر کی گئی۔ حضرت عثمان (رض) کو یہ بات بہت گراں گذری۔ پس آپ نے قریش اور انصار کے بارہ افراد جمع کیے، جن میں ابی بن کعب، زید بن ثابت، سعید بن العاص (رض) بھی تھے۔ پھر آپ (رض) نے حضرت عمر (رض) کے گھر سے وہ ڈبہ منگوایا کہ جس میں قرآن پاک تھا۔ اور اسی سے لوگ رجوع کرتے تھے۔
محمد کہتے ہیں : مجھے کثیر بن افلح نے بیان کیا کہ وہ بھی قرآن پاک لکھتے تھے۔ بسا اوقات کسی شئی میں اختلاف ہوجاتا تو اس کو لکھنے کے لیے موخر کردیتے تھے محمد کہتے ہیں۔ میں نے کثیر بن افلح سے پوچھا یہ کیوں ؟ انھوں نے لاعلمی کا اظہار کیا۔ محمد کہتے ہیں : میرا گمان ہے اور تم اس کو یقین کا درجہ نہ دینا یہ کہ وہ اس لیے اس اختلاف شدہ حصہ کو لکھنے سے موخر کردیتے تھے تاکہ اپنے درمیان ایسے کسی شخص کو دیکھیں جس نے سب سے آخر میں وہ (رسول اللہ (صلی اللہ علیہ وآلہ وسلم) سے) سنی ہو۔ اور اس کے قول پر اس کو لکھیں۔ رواہ ابن ابی داود۔
فائدہ : ۔۔ اس گمان کی حقیقت روایت نمبر 4776 میں ملاحظہ فرمائیں۔ جہاں اس کا واضح جواب گذر چکا ہے۔