4895: ۔۔۔ حضور (صلی اللہ علیہ وآلہ وسلم) سے جب کسی چیز کا سوال کیا جاتا تو آپ کی عادت مبارک یہ تھی کہ اگر اس کام کو کرنے یا اس چیز کو عطا کرنے کا خیال ہوتا تو نعم ، ہاں فرما دیتے۔ اور اگر نہ کرنے کا خیال ہوتا تو خاموش ہوجاتے لیکن لا یعنی نہیں ، نہیں کرتے تھے۔
ایک مرتبہ ایک اعرابی آپ (صلی اللہ علیہ وآلہ وسلم) کی خدمت میں حاضر ہوا اور کچھ سوال کیا۔ آپ خاموش رہے۔ اس نے پھر سوال کیا آپ خاموش رہے۔ اس نے تیسری بار بھی سوال کردیا تب آپ (صلی اللہ علیہ وآلہ وسلم) نے جھڑکنے کے انداز میں فرمایا : اے اعرابی ! سوال کر جو بھی چاہتا ہے۔ صحابہ کرام اس کی ذات پر رشک کرنے لگے، صحابہ کے دل میں خیال پیدا ہوا کہ شاید یہ جنت مانگے گا۔ لیکن اعرابی نے کہا : میں آپ سے سواری کا جانور مانگتا ہوں۔ آپ (صلی اللہ علیہ وآلہ وسلم) نے فرمایا تجھے دیا۔ اعرابی نے پھر کہا : اور میں زاد (یعنی توشہ) کا بھی سوال کرتا ہوں۔ آپ (صلی اللہ علیہ وآلہ وسلم) نے فرمایا : تجھے دیا۔ صحابہ فرماتے ہیں ہمیں اس پر بہت تعجب ہوا کہ (ہر چیز مانگ سکتا تھا لیکن یہ اتنی حقیر چیزوں پر راضی ہوگیا) پھر نبی کریم (صلی اللہ علیہ وآلہ وسلم) نے اعرابی کے بارے میں فرمایا : اس اعرابی اور بنی اسرائیل کی بڑھیا کے سوالوں کے درمیان کتنا فرق ہے ؟ پھر آپ (صلی اللہ علیہ وآلہ وسلم) نے (اس کی وضاحت میں اس بڑھیا کا قصہ) ارشاد فرمایا :
جب موسیٰ (علیہ السلام) کو حکم سمندر عبور کرنے کا ملا اور آپ سمندر تک پہنچے تو جانوروں کے چہرے مڑ گئے (یعنی سمندر نے راستہ نہ دیا) حضرت موسیٰ (علیہ السلام) نے عرض کیا : اے پروردگار ! یہ میرے ساتھ کیا ہورہا ہے ؟ (ادھر سمندر، راستہ نہیں دے رہا اور تیرا حکم ہے کہ اس کو عبور کروں) اللہ تبارک و تعالیٰ نے فرمایا : تم یوسف (علیہ السلام) کی قبر کے پاس ہو اپنے ساتھ اس کی ہڈیوں کو لے کر۔ (پھر سمندر تم کو راستہ دے گا) حضرت موسیٰ (علیہ السلام) نے دیکھا تو قبر زمین کے برابر ہوچکی تھی۔ (اور اس کا کوئی نام و نشان نہ تھا) موسیٰ (علیہ السلام) کو پتہ نہ چل رہا تھا کہ قبر کہاں ہے ؟ لوگوں نے کہا : اگر کوئی ہم میں سے ان کی قبر کو جان سکتا ہے تو فلاں بڑھیا ہی ہے جس کو شاید اس کا علم ہو۔
یوسف (علیہ السلام) کی قبر
موسیٰ (علیہ السلام) نے اس کو پیغام بھیج کر بلایا اور پوچھا کیا تو جانتی ہے کہ یوسف (علیہ السلام) کی قبر کہاں ہے ؟ بڑھیا نے ہاں میں جواب دیا۔ حضرت موسیٰ (علیہ السلام) نے فرمایا : مجھے اس کا پتہ دو ۔ بڑھیا بولی : ہرگز نہیں اللہ کی قسم ! جب تک تم میرا سوال پورا نہ کرو۔ موسیٰ نے فرمایا : بولو تمہیں تمارا سوال دیا۔ بڑھیا بولی : میں تم سے سوال کرتی ہوں کہ جنت میں جس درجہ میں تم کو جگہ ملے اسی درجہ میں مجھے بھی ٹھکانا دیا جائے ۔ حضرت موسیٰ (علیہ السلام) نے فرمایا : تم صرف جنت کا سوال کرلو۔ بڑھیا بولی نہیں۔ اللہ کی قسم ! میں تو تمہارے ساتھ ہی ہونا چاہتی ہوں۔ موسیٰ (علیہ السلام) بار بار اس کو منع فرماتے رہے۔ آخر اللہ پاک نے موسیٰ (علیہ السلام) کو وحی فرمائی۔ اس کو اس کا سوال دیدو۔ (یعنی حامی بھرلو) اس سے تمہارے حق میں کسی چیز کی کمی نہ ہوگی۔ چنانچہ حضرت موسیٰ (علیہ السلام) نے اس کو اس کا سوال دیا اور تب بڑھیا نے پتہ بتایا۔ حضرت موسیٰ (علیہ السلام) نے ہڈیوں کو نکالا اور سمندر عبور کیا۔ الاوسط للطبرانی، الخرائطی فی مکارم الاخلاق۔