4897: ۔۔ (مسند طلحہ بن عبیداللہ (رض)) ابن ابی الدنیا اپنی کتاب محاسبۃ النفس میں فرماتے ہیں : مجھے عبدالرحمن بن صالح المحاربی عن لیث کی سند سے بیان کیا کہ حضرت طلحہ (رض) سے مروی ہے۔
ایک شخص نے ایک دن اپنے کپڑے اتارے اور تیز دھوپ میں زمین پر لوٹ پوٹ ہونے لگا۔ اور اپنے نفس کو ڈانٹنے لگا، لے مزہ چکھ ، جہنم کی آگ کا۔ (لے مزہ چکھ جہنم کی آگ کا) تو رات کو تو مردار بنا پڑا رہتا ہے اور دن کو اکڑ خان بنا پھرتا ہے۔ اس شخص کی اسی حالت میں رسول اللہ (صلی اللہ علیہ وآلہ وسلم) پر نظر پڑی، آپ ایک درخت کے سائے تلے بیٹھے تے۔
لہذا وہ شخص زمین سے اٹھ کر نبی کریم (صلی اللہ علیہ وآلہ وسلم) کے پاس حاضر ہوا اور عرض کیا مجھ پر میرا نفس غالب آگیا تھا (اس وجہ سے اس کو سزا دے رہا تھا) نبی کریم (صلی اللہ علیہ وآلہ وسلم) نے اس کو فرمایا : تیرے لیے آسمان کے دروازے کھل گئے یں اور اللہ پاک تیرے ساتھ ملائکہ پر فخر فرما رہے ہیں۔ پھر آپ (صلی اللہ علیہ وآلہ وسلم) نے اپنے اصحاب کو فرمایا اپنے بھائی سے توشہ حاصل کرلو۔ پس کوئی کہنے لگا اے فلاں ! میرے لیے دعا کردے۔ نبی کریم (صلی اللہ علیہ وآلہ وسلم) نے اس شخص کو فرمایا : تم ان سب کے لیے دعا کردو۔ وہ شخص دعا کرنے لگا۔
اللہم اجعل التقوی زادھم واجمع علی الھدی امرھم۔
اے اللہ تقوی کو ان کا توشہ بنا دے اور ہدایت پر ان کے کام کو جمع کردے۔
نبی (صلی اللہ علیہ وآلہ وسلم) نے دعا کی : اللہم سددہ اے اللہ اس کو (دعا میں) درست راہ سمجھا۔ پھر اس شخص نے یہ دعا (بھی) کی : واجعل الجنبۃ مآبہم۔ اور جنت کو ان کا ٹھکانا بنا دے۔ (ابن ابی الدنیا فی محاسبۃ النفس)