4947: ۔۔ (مسند صدیق (رض)) حضرت ابوبکر (رض) سے مروی ہے کہ رسول اللہ (صلی اللہ علیہ وآلہ وسلم) جب صبح کی نماز سے فارغ ہوجاتے۔
دوسری روایت میں ہے جب صبح کی نماز پڑھ لیتے اور سورج طلوع ہوجاتا تو یہ فرماتے :
مرحبا بالنهار الجديد والکاتب والشهيد اکتبا بسم اللہ الرحمن الرحيم : أشهد أن لا إله الا اللہ ، واشهد ان محمدا رسول اللہ ، وأشهد ان الدين كما وصف اللہ والکتاب کما أنزل اللہ ، وأشهد ان الساعة آتية لا ريب فيها ، وان اللہ يبعث من في القبور ۔۔
خوش آمدید دن کو، کاتب اور گواہ (فرشتوں) کو تم لکھو : اللہ کے نام سے جو بڑا مہربان نہایت رحم کرنے والا ہے۔ میں شہادت دیتا ہوں کہ اللہ کے سوا کوئی معبود نہیں اور میں شہادت دیتا ہوں کہ محمد اللہ کے رسول ہیں اور میں شہادت دیتا ہوں کہ دین و ہے جس کی اللہ نے تعریف کی اور کتاب وہ ہے جو اللہ نے نازل کی اور میں شہادت دیتا ہوں کہ قیامت آنے والی ہے اس میں کوئی شائبہ نہیں اور اللہ پاک قبروں میں پڑے ہوئے مردوں کو زندہ کرکے اٹھانے والا ہے۔ الخطیب فی التاریخ ، الدیلمی، ابن عساکر، السلفی فی انتخاب حدیث القراء۔
کلام : ۔۔ اس روایت کی اسناد میں ایک راوی زنفل العرقی ہے جو ضعیف ہے۔ پورا نام زنفل بن عبداللہ ابو عبداللہ المکی جس کو ابن شداد بھی کہا جاتا ہے۔ اہل حدیث کے ہاں ضعیف ہے تھذیب التھذیب 3/ 340 ۔