4983: ۔۔۔ (مرسل عطاء (رح)) ابن جریح (رح) سے مروی ہے کہ حضور (صلی اللہ علیہ وآلہ وسلم) کے پاس کوئی صحابی حاضر ہوئے اور عرض کیا : یا نبی اللہ ! آپ کے پہلے صحابی اعمال میں ہم سے سبقت لے گئے۔ حضور (صلی اللہ علیہ وآلہ وسلم) نے فرمایا : میں تم کو ایسی شے نہ بتاؤں جو تم فرض نماز کے بعد کرو اور اس کے ذریعہ سابقین کو پالو اور لاحقین تم کو نہ پاسکیں۔ لوگوں نے کہا ضرور یا رسول اللہ ! سو آپ نے ان کو حکم دیا کہ چونتیس بار اللہ اکبر، تینتیس بار الحمد للہ اور تینتیس بار سبحان اللہ پڑھا کریں۔
راوی فرماتے ہیں : ہمیں ایک آدمی نے خبر دی کہ پھر آپ (صلی اللہ علیہ وآلہ وسلم) کے پاس کچھ مسکین لوگ آئے انھوں نے کہا : ہم پر اجر میں پہلے لوگ غالب آگئے ہیں، ہمیں کوئی ایسے اعمال بتائیے کہ ہم ان پر غالب آسکیں۔ آپ (صلی اللہ علیہ وآلہ وسلم) نے ان کو بھی مذکورہ عمل بتایا۔ جب یہ بات مالدار لوگوں کو پہنچی تو انھوں نے بھی اس پر عمل شروع کردیا۔ مسکینوں نے یہ ماجرا دیکھ کر پھر حضور (صلی اللہ علیہ وآلہ وسلم) کی خدمت میں درخواست کی تو آپ (صلی اللہ علیہ وآلہ وسلم) نے فرمایا یہ تو فضائل ہیں (جو بھی حاصل کرلے) ۔