4991: ۔۔ (عثمان بن عفان (رض)) سعد بن ابی وقاص (رض) سے مروی ہے کہ میں عثمان بن عفان (رض) کے پاس سے گزر جو مسجد میں تشریف فرما تھے۔ میں نے ان کو سلام کیا۔ انھوں نے مجھ سے آنکھیں بند کرلیں اور میرے سلام کا جواب بھی نہ دیا۔ میں عمر بن خطاب (رض) کے پاس آیا اور عرض کیا : یا امیر المومنین ! میں ابھی عثمان بن عفان کے پاس سے گذرا تھا میں نے ان کو سلام کیا تو انھوں نے کوئی سلام کا جواب کیوں نہیں دیا ؟ حضرت عثمان (رض) نے فرمایا : نہٰں، میں نے تو ایسا نہیں کیا۔ حضرت سعد (رض) بولے : ہاں ایسا ہی ہوا ہے۔ پھر حضرت عثمان (رض) کو یاد آگیا اور انھوں نے فرمایا : ہاں، میں اللہ سے توبہ و استغفار کرتا ہوں۔ جب آپ میرے پاس سے گذرے تو میں ایک کلمہ کو یاد کرنے کی کوشش کررہا تھا جو میں نے رسول اللہ (صلی اللہ علیہ وآلہ وسلم) سے سنا تھا اللہ کی قسم میں جب بھی اس کو یاد کرنے کی کوشش کرتا ہوں تو کوئی پردہ میری آنکھیں اور قلب پر پڑجاتا ہے۔
حضرت سعد (رض) نے فرمایا : میں تم کو بتاتا ہوں۔ رسول اللہ (صلی اللہ علیہ وآلہ وسلم) نے ایک مرتبہ ہم کو پہلی دعا کا ذکر کیا۔ لیکن پھر ایک اعرابی نے آ کر آپ (صلی اللہ علیہ وآلہ وسلم) کو باتوں میں مشغول کرلیا۔ پھر حضور (صلی اللہ علیہ وآلہ وسلم) کھڑے ہو کر چل دیے۔ میں بھی آپ کے نقش قدم پر ہولیا۔ لیکن مجھے در لگا کہ کہیں آپ مجھے ملنے سے پہلے گھر میں داخل نہ ہوجائیں۔ چنانچہ میں نے تیز تیز قدم اٹھائے۔ (قدموں کی آہٹ پر) نبی (صلی اللہ علیہ وآلہ وسلم) میری طرف متوجہ ہوئے اور پوچھا : کون ؟ ابو اسحاق ! میں نے عرض کیا : جی ہاں یا رسول اللہ ! آپ (صلی اللہ علیہ وآلہ وسلم) نے پوچھا کیا ہے ؟ میں نے عرض کیا : واللہ ! آپ نے ہم سے پہلی دعا کا ذکر کیا تھا پھر وہ اعرابی آگیا۔ حضور (صلی اللہ علیہ وآلہ وسلم) نے ارشاد فرمایا : ہاں وہ ذی النون (مچھلی والے) کی دعا ہے :
لا الہ الا انت سبحانک انی کنت من الظالمین۔
اے اللہ ! تیرے سوا کوئی معبود نہیں میں ہی ظالموں میں سے ہوں۔
کسی مسلمان نے ان کلمات کے ساتھ کسی چیز کی دعا نہیں کی مگر وہ ضرور قبول ہوتی ہے۔ مسند ابی یعلی، الکبیر للطبرانی فی الدعاء۔
حدیث صحیح ہے۔