5020: ۔۔ (انس (رض)) ابان (رح) سے مروی ہے وہ حضرت انسب سے روایت کرتے ہیں، حضرت انس (رض) ایک بار (دعوت کی غرض سے) حجاج بن یوسف کے پاس تشریف لے گئے۔ حجاج نے آپ (رض) کو اپنا مال دکھایا جس میں چار سو گھوڑے تھے، سو گھوڑے دو سال کے بعد تیسرے سال میں داخل تھے، سو گھوڑے دوسرے سال میں داخل تھے، سو گھوڑے پانچویں سال میں داخل تھے اور سو گھوڑے قارح دانت والے تھے۔
پھر حجاج نے کہا : اے انس ! کیا تو نے اپنے ساتھی کے پاس کبھی اتنا مال دیکھا تھا۔ اس خبیث کی مراد رسول اللہ (صلی اللہ علیہ وآلہ وسلم) سے تھی۔ حضرت انس (رض) نے فرمایا : بالکل، اللہ کی قسم ! اس سے بھی اچھا مال دیکھا تھا۔ میں نے رسول اللہ (صلی اللہ علیہ وآلہ وسلم) کو فرماتے سنا تھا : گھوڑے تین قسم کے ہوتے ہیں : ایک وہ گھوڑا جو مالک نے اللہ کی راہ میں جہاد کے لیے باندھا ہو۔ اس کے بال، اس کا پیشاب ، اس کا گوشت اور اس کا خون قیامت کے دن، اس کے میزان کے پلڑے میں رکھا جائے گا۔ دوسرا گھوڑا جس کو کسی نے افزائش نسل کے لیے رکھا ہو اور تیسرا وہ گھوڑا جس کو کسی نے افزائش ریاء شہرت اور دکھاوے کے لیے باندھا ہو ایسا شخص جہنم میں جائے گا۔ اے حجاج تیرے تمام گھوڑے اسی تیسری قسم کے ہیں۔
حجاج غضب آلود ہوگیا۔ بولا : اللہ کی قسم ! اگر تو نے رسول اللہ (صلی اللہ علیہ وآلہ وسلم) کی خدمت نہ کی ہوتی اور امیر المومنین نے مجھے تیری رعایت کا خط نہ لکھا ہوتا تو دیکھتا میں تیرے ساتھ کیا کچھ کرتا۔ حضرت انس (رض) نے ارشاد فرمایا : ہرگز نہیں (اللہ کی قسم) میں تجھ سے ایسے کلمات کی بدولت پناہ میں آگیا ہوں کہ اب مجھے کسی بادشاہ کے ظلم کا اور کسی شیطان کی سرکشی کا کام خوف ذرہ بھر نہیں۔ پھر واقعی حجاج کا غصہ چھٹ گیا اور وہ بولا : اے ابو حمزہ ! (حجاج نے انس کی کنیت بطور ادب استعمال کی) وہ کلمات مجھے بھی سکھا دیجیے حضرت انس نے فرمایا : اللہ کی قسم ! نہیں ، میں تجھے ان کلمات کا اہل نہیں پاتا۔
حضرت ابان (رح) راوی حدیث فرماتے ہیں جب آپ (رض) کی وفات کا وقت قریب آیا تو میں آپ کی خدمت میں حاضر ہوا اور عرض کیا : اے ابو حمزہ ! میں آپ سے کوئی سوال کرنا چاہتا ہوں ؟ فرمایا : بولو کیا چاہتے ہو ؟ ابان (رح) نے عرض کیا : وہ کلمات جو آپ سے حجاج نے پوچھے تھے فرمایا : ہاں، اللہ کی قسم ! میں تم کو ان کا اہل سمجھتا ہوں۔ سنو ! میں نے رسول اللہ (صلی اللہ علیہ وآلہ وسلم) کی دس سال خدمت کی پھر آپ مجھ سے جدا ہونے لگے تو آپ مجھ سے راضی تھے آپ نے فرمایا : تم نے میری دس سال خدمت کی ہے اور میں تم کو چھوڑ کر جارہا ہوں اور میں تم سے راضی ہوں۔ لہٰذا تم (کو یہ عطیہ ہے کہ) جب بھی صبح و شام کا وقت ہوا کرے یہ پڑھا کرو :
بسم اللہ ، والحمد لله ، محمد رسول اللہ ، لا قوة الا بالله ، بسم اللہ علی دينى ، ونفسي ، بسم اللہ علی أهلي ومالي ، بسم اللہ علی كل شئی أعطانيه ربي ، بسم اللہ خير الاسماء ، بسم اللہ رب الارض والسماء ، بسم اللہ الذی لا يضر مع اسمه داء ، بسم اللہ افتتحت وعلی اللہ توکلت ، لا قوة الا بالله ، لا قوة الا بالله ، لا قوة الا بالله ، والله أكبر ، اللہ أكبر ، اللہ أكبر ، اللہ أكبر ، لا إله الا اللہ الحليم الكريم لا إله الا اللہ العلي العظيم ، تبارک اللہ رب السموات السبع ورب العرش العظيم ، ورب الارضين ، وما بينهما ، والحمد لله رب العالمين ، عز جارک ، وجل ثناؤك ، ولا إله غيرك ، اجعلني في جو ارک من شر کل ذی شر ، ومن شر الشيطان الرجيم ، ان وليي اللہ الذی نزل الکتاب وهو يتولی الصالحين ، فان تولوا فقل حسبی اللہ لا إله الا هو عليه توکلت وهو رب العرش العظيم ۔(ابو الشیخ فی الثواب)