5114: ۔۔ (شداد بن اوس) مطرف بن عبداللہ بن شخیر ابلتین کے کسی شخص سے روایت کرتے ہیں کہ میں اور میرا ایک ساتھی شداد بن اوس کے پاس گئے۔ حضرت شداد (رض) نے فرمایا :
میں تم دونوں کو ایک حدیث بتاتا ہوں جو رسول اللہ (صلی اللہ علیہ وآلہ وسلم) ہمیں سفر و حضر میں سکھاتے تھے :
پھر آپ (رض) نے و دعا والی حدیث ہم کو املاء کرائی اور ہم نے لکھ لی :
اللهم إنى أسألک الثبات في الامر ، وأسألک عزيمة الرشد ، وأسألک شکر نعمتک ، وأسألک حسن عبادتک ، وأسألك يقينا صادقا ، وأسألک قلبا سليما ، وأسألک من خير ما تعلم ، واعوذ بک من شر ما تعلم ، واستغفرک لما تعلم إنك أنت علام الغيوب۔
شروع اللہ کے نام سے جو بڑا مہربان نہایت رحم والا ہے۔ اے اللہ ! میں تجھ سے دین میں ثابت قدمی کا سوال کرتا ہوں، سیدھی راہ پر مضبوطی کا سوال کرتا ہوں، تیری نعمتوں پر شکر کی توفیق کا سوال کرتا ہوں، تیری اچھی طرح عبادت کرنے کا سوال کرتا ہوں، سچے یقین کا سوال کرتا ہوں، قلب سلیم کا سوال کرتا ہوں، ہر خیر کا سوال کرتا ہوں جو تیرے علم میں ہے، ہر شر سے تیری پناہ چاہتا ہوں، جو تیرے علم میں ہے اور ان گناہوں سے مغفرت مانگتا ہوں جو تیرے علم میں ہیں۔ یا ارحم الراحمین۔
شداد (رض) نے فرمایا مجھے حضور (صلی اللہ علیہ وآلہ وسلم) نے ارشاد فرمایا : اے شداد بن اوس ! جب تو لوگوں کو دیکھے کہ وہ سونا چاندی جمع کرنے میں مشغول ہیں تو تو ان کلمات کا خزانہ کرلینا۔ (رواہ ابن عساکر)