٥٧٠٢۔۔۔ میرے سامنے (عالم مثال میں) انبیاء اپنی امتوں کے ساتھ پیش ہوئے، ایک نبی گزرتا تو اس کے ساتھ تین افراد ہوتے، پھر کوئی نبی گزرتا تو اس کے ساتھ ایک ٹولی ہوتی، اور کسی نبی کے ساتھ ایک جماعت ہوتی اور کوئی نبی ایسا بھی تھا کہ اس کے ساتھ کوئی نہ تھا، یہاں تک کہ میرے سامنے موسیٰ (علیہ السلام) پیش کئے گئے ان کے ساتھ ، بنی اسرائیل کی بھیڑ تھی۔ (انہیں دیکھ کر) مجھے تعجب ہوا، میں نے کہا : یہ کون لوگ ہیں ؟ تو کہا گیا : یہ آپ کے بھائی موسیٰ (علیہ السلام) اور ان کے ساتھ بنی اسرائیل ہیں، میں نے کہا : میری امت کہاں ہے ؟ مجھے کہا گیا : اپنے دائیں طرف دیکھو، میں نے دیکھا کہ ایک شاہراہ کو لوگوں کے چہروں نے بند کر رکھا ہے ، مجھے پھر کہا گیا : اپنے بائیں طرف دیکھو، میں نے ناگہاں دیکھا تو افق لوگوں کے چہروں سے بھرا ہوا ہے، مجھے کہا گیا : کیا آپ راضی ہیں ؟ میں نے کہا : اے میرے رب ! میں راضی ہوں، پھر مجھے کہا گیا : ان لوگوں کے ساتھ ستر ہزار لوگ ایسے ہیں جو بغیر حساب کے جنت میں جائیں گے۔
تم پر میرے ماں باپ قربان ہوں، اگر تم سے ہو سکے کہ ان ستر ہزار میں سے ہوجاؤ تو ہوجانا، اور پھر اگر تم سے کوتاہی ہو تو شاہراہ والوں سے ہوجانا، اور مزید اگر کوتاہی کرو تو افق والوں سے ہوجانا، اس واسطے کہ میں نے لوگوں کو دیکھا وہ بہت بڑی تعداد میں ہوں گے اور ایک دوسرے پر فخر کر رہے ہوں گے میں امید کرتا ہوں کہ جن لوگوں نے میری اتباع کی وہ جنت کا چوتھائی حصہ ہوں گے، مجھے امید ہے کہ وہ اہل جنت کا نصف ہوں گے، اتنے میں عکاشہ اٹھے اور عرض کرنے لگے : یا رسول اللہ ! اللہ تعالیٰ سے دعا کیجئے کہ مجھے ان پر (ہزار) میں سے بنا دے، آپ نے ان کے لیے دعا فرمائی ، تھوڑی دیر کے بعد ایک دوسرا شخص اٹھا اور کہنے لگا میرے لیے اللہ تعالیٰ سے دعا کریں کہ وہ مجھے ان لوگوں میں سے بنا دے، آپ نے فرمایا : عکاشہ تم سے سبقت لے گیا، پھر کسی نے کہا : وہ ستر ہزار کون ہیں ؟ آپ نے فرمایا : جو نہ داغ لگاتے ہیں ، نہ جھاڑ پھونک کرتے نہ فال لیتے ہیں، اور اپنے رب پر توکل کرتے ہیں۔ (عبد الرزاق فی المصنف مسند احمد، طبرانی فی الکبیر مستدرک حاکم، عن ابن مسعود)