٦٠٠۔۔ تم فلاح کے بارے میں جھگڑتے ہوئے دو حصوں میں بٹ گئے جبکہ اسی وجہ سے تم سے پہلی اقوام قعر ہلاکت میں جاگریں۔ سنو ! یہ رحمن ورحیم کی کتاب ہے ، اس میں اہل جہنم اور ان کے آبا و اجداد اور ان کے قبائل وغیرہ کے نام ہیں، اور آخر میں لکھا ہوا ہے ان میں سے کبھی ایک فرد کی کمی بھی نہیں ہوسکتی، اور ایک فریق جنت میں ہے اور ایک فریق جہنم میں۔
اور یہ کتاب بھی رحمن ورحیم کی ہے اور اس میں اہل جنت اور ان کے آباء و اجداد اور ان کے قبائل وغیرہ کے نام ہیں اور آخر میں لکھا ہوا ہے ان میں سے کبھی ایک فرد کی کمی بھی نہیں ہوسکتی۔ اور ایک فریق جنت میں ہے اور ایک فریق جہنم میں۔ الدار قطنی فی الافراد بروایت ابن عباس (رض)۔
حدیث مذکورہ کا پس منظر یہ ہے کہ ایک مرتبہ حضور اپنے دولت کدہ سے باہر تشریف لائے تو دیکھا کہ صحابہ کرام رضوان اللہ اجمعین تقدیر کے مسئلہ میں الجھ رہے ہیں تب آپ نے مذکورہ خطاب فرمایا۔