٦٣٤٤۔۔۔ اللہ تعالیٰ نے جب آدم (علیہ السلام) کو جنت سے زمین کی طرف اتارا تو ہر اس چیز نے ان کے متعلق غم کیا جو ان کے ساتھ تھی صرف سونے چاندی نے کسی قسم کا غم نہیں کیا تو اللہ تعالیٰ نے ان دونوں کی طرف اپنا پیام بھیجا : میں نے تمہیں اپنے بندوں میں سے ایک بندے کا پڑوس عطا کیا پھر میں نے اسے تمہارے پڑوس سے دور کردیا، پھر سوائے تمہارے ہر چیز نے اس کے لیے دکھ کا اظہار کیا جو اس کے ساتھ رہی۔ تو وہ دونوں بولے : اے ہمارے الہٰ ! اے ہمارے آقاً ! آپ بخوبی جانتے ہیں ، کہ آپ نے ہمیں اس کا پڑوس عطا کیا اور وہ آپ کا فرمان بردار تھا، پس جب اس نے آپ کی نافرمانی کی تو ہم نے اس کے لیے غم گین ہونا پسند نہیں کیا، تو اللہ تعالیٰ نے ان دونوں کی طرف پیام بھیجا، مجھے اپنی عزت اور جلال کی قسم ! میں تم دونوں کو اتنی عزت دوں گا کہ ہر چیز تمہاری وجہ سے ہی حاصل ہوگی۔ (الدیلمی وابن النجار عن انس)
تشریح :۔۔۔ حضرت آدم (علیہ السلام) کا جنت سے آنا بتقدیر الٰہی تھا اور سونے چاندی کا عمل بظاہر ان کے مطابق تھا، جس کی بدولت اللہ تعالیٰ نے انھیں دائمی مقام بخشا، مگر وہ بھی انسان کے لیے ہی استعمال کے قابل ٹھہرے۔