٦٤٩٨۔۔۔ صبر آدھا ایمان اور یقین سارے کا سارا ایمان ہے۔ (الحلیۃ، بیہقی عن ابن مسعود)
تشریح :۔۔۔ کیونکہ بےصبری کی بنا پر انسان جادہ اعتدال عبور کرکے کفریات بکنے لگتا ہے، کچھ لوگوں پر آسمانی آفت آئی تو وہ کہنے لگے، ہم اس خدا کا کیسے شکر کریں جس نے ہمارے گھر اجاڑ دئیے، ہمارے بچے چھین لیے، مال مویشی تباہ و برباد کر ڈالے، اگر یہ لوگ صبر کرتے تو کافر نہ ہوتے لیکن بےصبری نے وہ سب کچھ کہلوایا جو نہ کہنا تھا اور یہ ساری خرابی یقین محکم کی کمزوری سے پیدا ہوتی ہے جسے پورا ایمان کہا گیا ہے۔