٦٧٠۔۔ مومن کے اخلاق میں سے ہے کہ وہ دین میں قوی ہو، نرمی و مہربانی میں احتیاط پیش نظر ہو۔ اس کا ایمان یقین کے ساتھ متصف ہو علم کا حریص ہو۔ ناراضگی میں شفقت کا دامن نہ چھوڑے ، تونگری میں میانہ روی اختیار کرے۔ فاقہ کشی کی حالت میں استغناء اور جمال کو ملحوظ رکھے حرص وطمع سے محفوظ رہے حلال پیشہ کو اپنی وطیرہ بنائے۔ بھلی بات پر مستقیم رہے۔ راہ ہدایت میں خوشی کے ساتھ گامزن رہے۔ شہوت اور ہوس پرستی کا غلام نہ ہو۔ مشقت زدہ پر رحم کھائے۔
بندگان خدا میں سے مومن بندہ کبھی پر دشمن پر ظلم نہیں رکھتا، دوست کے بارے میں گناہ کا مرتکب نہیں ہوتا، امانت خیانت کا مرتکب نہیں ہوتا، حسد، تشنیع ، اور لعنت بازی سے کوسوں دور رہتا ہے حق بات کے آگے سرتسلیم خم کردیتا ہے اور خواہ اس موقع پر موجود نہ ہوبرے القاب کے ساتھ کسی مسلمان کو ستاتا نہیں ہے۔
نماز میں خشوع و خضوع کے ساتھ مستغرق ہوتا ہے اور ادائیگی زکوۃ میں سبک روی کرتا ہے حوادثات اور سختیوں میں وقار سکینت کا دامن اس سے نہیں چھوٹتا، خوشی و آسانی کے مواقع پر شکرگزار رہتا ہے موجود پر قانع رہتا ہے غیر موجودہ کا دعوی نہیں کرتا غصہ میں ظلم کی نہیں ٹھان بیٹھتا۔ کسی نیک کام میں بخل کو آڑے نہیں آنے دیتا۔ حصول علم کی خاطر لوگوں سے میل جول رکھتا ہے لوگوں سے قابل فہم گفتگو کرتا ہے اس پر ظلم وستم ڈھایا جائے تو صبر کرتا ہے حتی کہ رحمن خود اس کا انتقام لیتا ہے۔ الحکیم بروایت جند ب بن عبداللہ۔