٨١٦۔۔ اے معاذ ! مومن حق کے ہاتھوں اسیر ہوتا ہے وہ بخوبی جانتا ہے کہ اس کے کان ، نگاہ ، زبان، ہاتھ ، پاؤں ، شکم اور شرم گاہ پر بھی ایک نگہبان ہے بیشک مومن کو قرآن نے اکثر خواہشات سے روک رکھا ہے اور اللہ کے حکم سے از خود اپنے اور اپنی مہلک خواہشات کے درمیان آچکا ہے یقیناً مومن کا دل اللہ کے عذاب کی طرف سے مطمئن نہیں ہوتا، نہ اس کا ہیجان سکون پاتا ہے نہ اس کی اضطرابی کیفیت کو تسکین ملتی ہے وہ اسی حالت میں حیران و پریشان رہتا ہے۔۔۔ حتی کہ وہ پل صراط سے پار ہوجائے۔ اس کو صبح وشام موت کا کھٹکا لگارہتا ہے پس تقوی اس کا ہم سفر ساتھی ہے قرآن اس کا رہنما ہے خوف اس کا تازیانہ ہے شوق اس کی سواری ہے تدبیر و احتیاط اس کا ساتھی ہے اللہ سے ڈرنا اس کا شعار ہے نماز اس کی پناہ گاہ ہے روزہ اس کی ڈھال ہے صدقہ اس کی جان کا نذرانہ ہے سچائی اور راست بازی اس کی امیر و فرمانروا ہے حیاء اس کا وزیر ہے اور ان تمام باتوں کے پس پردہ اس کا پروردگار گھات لگائے ہوئے ہے۔
اے معاذ ! قیامت کے روز مومن سے اس کی تمام کاوشوں کے بارے میں سوال کیا جائے گا، حتی کہ اس کے آنکھ میں سرمہ لگانے کے متعلق بھی استفسار کیا جائے گا اے معاذ میں تیرے لیے بھی وہی پسند کرتا ہوں جو اپنے لیے پسند کرتا ہوں اور تجھے بھی ان چیزوں سے باز رکھنا چاہتاہوں جن سے جبرائیل نے مجھے باز رکھا۔ پس میں تم کو قیامت کے روز ایسی صورت حال میں نہ پاؤں کہ جس کام کی تمہیں خدا کی طرف سے توفیق ملی ہے اس میں تم سے زیادہ کوئی سعادت مند ہو۔ الحلیہ، بروایت معاذ۔