٨٣٩٩۔۔۔ (مسند علی (رض)) ضرار بن صرد سے وہ عاصم بن حمید سے ، ابوحمزہ الثمالی عبدالرحمن بن جندب سے ، کمیل بن زیاد کے حوالہ سے وہ فرماتے ہیں کہ حضرت علی (رض) نے فرمایا : سبحان اللہ ! لوگ کس قدر بھلائی سے بےرغبت ہوگئے ؟ اس مسلمان پر تعجب ہے جس کے پاس اس کا مسلمان بھائی کسی ضرورت سے آتا ہے تو وہ اپنے کو بھلائی کا اہل نہیں سمجھتا، وہ اگر ثواب کی امید اور عقاب وسزا کا خوف نہ رکھتا تو اس کے لیے مناسب ہوتا کہ وہ اچھے اخلاق میں اگے بڑھتا، کیونکہ یہ کامیابی کی راہ دکھاتے ہیں۔
اتنے میں آپ کے پاس ایک آدمی آیا اور کہنے لگا امیر المومنین ! میرے ماں باپ آپ پر قربان ہوں ، کیا آپ نے یہ بات رسول اللہ (صلی اللہ علیہ وآلہ وسلم) سے سنی ہے ؟ آپ نے فرمایا : ہاں ، اور جو اس سے بھی بہتر ہے، جب بنی طے کے قید یوں کو لایا گیا تو ایک لڑکی کھڑی ہوئی جس کا سرخ رنگ تھا اس کے ہونٹ سیاہی مائل تھے، اس کی ناک کا بانسہ برابر تھا اور اس کی ناک قدرے اونچی تھی، اس کی گردن لمبی تھی میانہ قد اور کھوپڑی والی تھی اس کے ٹخنے پر گوشت تھے اور اس کی پنڈلیاں موٹی موٹی تھیں۔
میں نے جب اسے دیکھا تو مجھے وہ بھاگئی، میں نے (دل میں ) کہا : کہ میں رسول اللہ (صلی اللہ علیہ وآلہ وسلم) سے ضرور مطالبہ کروں گا کہ اسے میرے مال غنیمت میں شامل کردیں، (لیکن) جب اس نے گفتگو کی تو میں اس کا حسن جمال بھول گیا کیونکہ وہ بڑی فصیح وبلیغ تھی، وہ کہنے لگی : اے محمد ! اگر آپ چاہیں تو مجھے چھوڑ دیں اور عرب کے قبائل کو مجھ پر ہنسائیں کیونکہ میں اپنے قوم کے سردار کی بیٹی ہوں ، اور میرا والد اپنی ذمہ داری کی حفاظت کرتا، مہمان کی ضیافت کرتا، کھانا کھلاتا ، سلام پھیلاتا ، ضرورت مند کو کبھی واپس نہ کرتا تھا میں حاتم طائی کی بیٹی ہوں ۔
تو نبی کریم (صلی اللہ علیہ وآلہ وسلم) نے فرمایا : اے لڑکی ! یہ تو پکے ایمان والوں کی صفات ہیں اگر تمہارا باپ مسلمان تھا تو ہم اس کے حق میں دعائے رحمت کرتے ہیں اس لڑکی کو چھوڑ دو کیونکہ اس کا والد اچھے اخلاق پسند کرتا تھا، اور اللہ تعالیٰ بھی اچھے اخلاق کو پسند کرتا ہے، اتنے میں ابوبردہ بن نیار کھڑے ہوئے اور عرض کرنے لگے : یارسول اللہ ! کیا اللہ تعالیٰ اچھے اخلاق پسند کرتا ہے ؟ تو رسول اللہ (صلی اللہ علیہ وآلہ وسلم) نے فرمایا : اس ذات کی قسم جس کے قبضہ قدرت میں میری جان ہے جنت میں اچھے اخلاق کے ذریعہ ہی کوئی جاسکتا ہے۔ (بیھقی فی الدلائل حاکم وفیہ ضرار بن صرد متروک، ورواہ ابن النجار من وجہ آخر من طریق سلیمان بن ربیع بن ہاشم، ثنا عبدالمجید بن صالح ابو صالح البرجمی عن زکریا بن عبداللہ بن یزید عن کمیل بن زیاد)
یہ خاتون حضرت سفینہ بنت حاتم ہیں جو حضرت عدی بن حاتم کی بہن ہیں دونوں بہن بھائیوں کو ایمان وصحابیت کا شرف حاصل ہے، تفصیل کے لیے دیکھیں، اخوت الصحابہ صحابہ کی بہنیں مطبوعہ نور محمد کراچی آرام باغ۔