٨٤٢٣۔۔۔ ابوجحیفہ سے روایت ہے کہ رسول اللہ (صلی اللہ علیہ وآلہ وسلم) نے حضرت سلمان اور ابوالدرداء (رض) کے درمیان مواخات (رشتہ) بھائی چارگی قائم فرمایا، ایک دفعہ حضرت سلمان ابوالدرداء (رض) کی زیارت کے لیے آئے، دیکھا تو ام الدرداء نے میلے کچیلے کپڑے پہن رکھے ہیں حضرت سلمان نے کہا : آپ نے یہ کیا حالت بنا رکھی ہے ؟ وہ کہنے لگیں تمہارے بھائی کو دنیا میں رغبت نہیں ، جب ابوالدرداء (رض) آئے، تو انھیں مرحبا کہا ان کے سامنے کھانا پیش کیا، حضرت سلمان نے کہا : تم بھی کھاؤ وہ کہنے لگے میں روزے سے ہوں ، تو حضرت سلمان نے کہا کہ میں تمہیں قسم دیتا ہوں کہ تم کھانا کھاؤ کے اور اس وقت تک میں بھی نہیں کھاؤں گا جب تک تم نہیں کھاتے، چنانچہ انھوں نے کھانے میں شرکت کرلی، اور رات انہی کے ہاں گزاری ، جب رات ہوگئی تو ابوالدرداء اٹھے تو سلمان نے انھیں روک لیاپھرکہا : ابودرداء تمہارے رب کا تم پر حق ہے، تمہاری بیوی ، تمہارے بدن کا تم پر حق ہے لہٰذا ہر حقدار کو اس کو حق دو ، کبھی روزہ رکھو کبھی افطار کرو، ( رات میں ) قیام کرو اور آرام بھی کرو، اپنی بیوی کا حق ادا کرو صبح کے قریب ان سے کہا : اب اٹھو، پھر دونوں حضرت اٹھے اور نماز ادا کی ، پھر (فرض) نماز کے لیے نکلے ، جب نبی کریم (صلی اللہ علیہ وآلہ وسلم) نماز پڑھا چکے تو ابوالدرداء (رض) نبی کریم (صلی اللہ علیہ وآلہ وسلم) کے پاس گئے اور جو باتیں حضرت سلمان نے کہیں وہ نبی (صلی اللہ علیہ وآلہ وسلم) کو بتائیں تو نبی کریم (صلی اللہ علیہ وآلہ وسلم) نے ان سے وہی باتیں کیں جو سلمان نے کی تھیں اور دوسری روایت میں ہے رسول اللہ (صلی اللہ علیہ وآلہ وسلم) نے فرمایا : ابودرداء تمہارے بدن کا تم پر حق ہے اور ان سے حضرت سلمان کی گفتگو جیسی گفتگو کی۔ (ابویعلی ، بخاری)